Minister di Finansa, Asunto Economico y Sector Primario, Geoffrey Wever, a confirma cu e ministeriele goedkeuring cu ta duna vrijstellingnan di impuesto na productornan local den sector primario lo continua durante e actual periodo di gobernacion. Cu e decision aki, Minister Wever ta duna claridad, continuidad y seguridad na productornan y empresanan cu ta inverti y traha diariamente pa fortalece produccion local di Aruba.
E confirmacion ta sigui despues di un reunion reciente cu representantenan di United Farmers Aruba, Comision Pro Cunukeronan Arubiano y Stichting Hadicurari, unda e organisacionnan a expresa preocupacion tocante continuidad di e facilidadnan fiscal pa sector primario. Minister Wever a atende e preocupacionnan y a considera importante pa elimina incertidumbre y duna e sector un señal cla. Gobierno ta mantene e maneho cu ta stimula produccion local y inversion den sector primario.
E ministeriële goedkeuring ta contempla, bou di e condicionnan aplicabel, vrijstelling di winstbelasting y inkomstenbelasting, y tambe belasting op bedrijfsomzetten y bestemmingsheffing AZV, pa entrada y omzet genera cu productonan produci na Aruba mediante agricultura y horticultura, pesca, apicultura y cria di bestia of pisca.
Minister Wever a confirma cu durante e actual periodo di gobernacion no tin intencion pa cambia of retira e ministeriele goedkeuring aki. E direccion di Gobierno ta keda enfoca riba aumenta produccion local, fortalece seguridad alimentario y crea un ambiente cu ta stimula inversion sostenibel den sector primario.
“Un sector primario fuerte mester por conta cu claridad y continuidad den maneho. Productornan cu ta inverti den nan terreno, ekiponan, produccion y futuro mester sa unda nan ta para. Como Gobierno nos responsabilidad ta pa crea e condicionnan necesario pa nan por sigui produci, inverti y crece. Fortalecemento di produccion local no ta solamente un asunto economico; e ta directamente relaciona cu seguridad alimentario y resiliencia di Aruba,” Minister Wever ta declara.
E siguiente paso ta pa duna e maneho un base mas structural. Minister Wever tin e intencion pa codifica e cuadro di maneho existente y ancra esaki den legislacion, pa fortalece continuidad y seguridad huridico pa productornan, empresanan y inversionistanan. E meta ta pa e regulacion legal necesario por drenta na vigor for di 1 di januari 2027.
Cu e paso aki Gobierno ta move di un ministeriele goedkeuring existente pa un structura cu ta ofrece un base legal mas duradero. Esaki ta importante pa un sector cu pa crece mester por haci inversionnan cu un vision a largo plaso. Claridad den maneho y seguridad huridico ta duna productor mas confiansa pa inverti, amplia produccion y contribui na un Aruba cu ta produci mas localmente.
Minister Wever ta enfatisa cu e facilidadnan fiscal ta bay man den man cu responsabilidad. Productornan y empresanan cu ta haci uso, of desea haci uso, di e vrijstellingnan mester sigui cumpli cu tur condicion vigente y cu e rekisitonan di registracion y administracion aplicabel.
Minister Wever ta aprecia e aporte di United Farmers Aruba, Comision Pro Cunukeronan Arubiano, Stichting Hadicurari y tur otro productor y organisacion cu ta representa e sector. E dialogo cu e sector lo continua, cu e obhetivo di identifica solucionnan concreto y crea condicionnan structural pa produccion local por sigui desaroya.
