Prome Minister Mike Eman a reacciona riba e decision di Hues pa pospone e tratamento di e caso relaciona cu actividadnan di UTV/ATV y proteccion di naturalesa pa cinco siman, creando asina espacio pa e partidonan sigui dialogo. Segun Premier Eman, esaki ta den liña cu e peticion cu Gobierno a haci precisamente pa evita cu e situacion sigui escala y pa crea oportunidad pa busca un solucion cu por funciona den practica.
“Loke nos ta busca ta un balans. Un balans entre proteha nos naturalesa y, na mes momento, tene cuenta cu e actividadnan recreativo y turistico y cu e hendenan cu ta gana nan pan di cada dia den e sector aki,” Premier Eman a expresa. Eman a enfatisa cu den un asunto caminda tin diferente interes, Gobierno no mester posiciona su mes como partido contra un otro, sino mantene su responsabilidad pa representa e interes general di comunidad Arubiano.
Segun Premier, hustamente den e situacionnan caminda e posicionnan por bira extremo, ta importante pa Gobierno, e institutonan y tur otro actor envolvi mantene e capacidad pa acerca otro y busca un punto di ekilibrio. “Nos responsabilidad como Gobierno ta pa busca e balans aki. Cualkier paso cu nos tuma mester ta guia pa e interes general di Aruba,” Eman a indica. E decision di Hues ta duna cinco siman adicional pa e proceso aki. Gobierno mester determina ainda awe un fecha y ora pa reuni cu ABC (Aruba Bird Life Conservation) durante e siman cu ta bin, mientras cu Hues tambe a indica cu tur partido, incluyendo tour operators, mester demonstra disposicion pa acerca otro. Pa Premier Eman, e periodo aki mester uza precisamente pa baha tension, acerca partidonan y busca un solucion responsabel, caminda proteccion di flora y fauna por bay hunto cu continuidad di actividad economico y turistico.
“Gobierno ta cla pa carga su responsabilidad den e proceso aki. Nos no ta busca un ganador y un perdedor; nos ta busca un solucion cu ta sirbi Aruba.”
