Durante Accion di Bario na Tarabana y Dakota, Prome Minister Mike Eman, acompaña pa miembro di parlamento Stephany Sevinger y su team a continua e contacto directo cu comunidad, bishitando e bario y combersando cu residentenan tocante loke ta bay bon y e necesidadnan cu ainda merece atencion. Un di e stopnan tabata Centro di Bario y Deporte Dakota, caminda a duna e premier a haya un rondleiding y splicacion tocante e actividadnan y proyectonan di e centro.
Durante e bishita, Premier Eman a comparti cu miembronan di Club Flor di Aloe cu tin como meta pa saca adultonan mayor for di cas y trece nan hunto. Toppenberg a expresa satisfaccion tambe cu e sosten cu e gruponan di adulto mayor ta ricibi. E contacto directo cu e residentenan a trece diferente tema dilanti. Un residente a destaca importancia di limpiesa y responsabilidad comparti, haciendo un yamada pa comunidad participa den e siguiente accion di Cuida Aruba dia 26 di september.
Tema di pensioen semper menciona durante cada accion, caminda adulto mayor a reconoce cu e mehoracion cu a tuma luga ta representa e yudansa. Habitantenan tambe a expresa satisfaccion cu e trabou di limpiesa den bario y, na mes momento, a presenta un peticion concreto pa mas siguridad den trafico den nan bario. E diferente encuentronan ta refleha e esencia di Accion di Bario: Gobierno ta sali cerca di hende, scucha directamente loke ta biba den comunidad y conoce tanto e progreso como e puntonan cu ainda mester atencion. Pa Premier Eman, e contacto aki ta esencial pa sigui traha, hunto cu comunidad, na barionan mas limpi, sigur y activo, cu atencion pa calidad di bida di cada generacion.
