Parlamentario Drs. Shailiny Tromp-Lee, den su funcion como Presidente di Comision Fiho di Finansas, Organisacion Gubernamental, Cultura y Deporte (CFOCS) di Parlamento, a manda instruccion oficial na e Griffier di comision pa convoca reunionnan cu e stakeholdersnan envolvi den e crisis di Horacio Oduber Hospital (HOH). E peticion ta pa e reunionnan den e comision aki tuma luga otro siman mes.
Preocupacion den comunidad y falta di informacion
E noticianan cu ta circulando encuanto e situacion financiero y operacional alarmante na Horacio Oduber Hospital (HOH) ta sigui genera hopi preocupacion den nos comunidad. Hasta Gobernador a keda informa al respecto, mientras cu Parlamento mes, como representante di pueblo, no tin ningun informacion.
Mirando e falta di claridad y transparencia di parti di e Minister di Salud Publico, cu te cu awor no a sali duna e splicacion necesario ni brinda trankilidad na pueblo, Parlamento mester tuma e liderazgo pa atende e asunto aki cu e urgencia cu e merece.
“Nos no por keda man crusa ta spera mientras e noticianan y e incertidumbre ta sigui crece. Como Parlamento, nos tin e responsabilidad di actua. P’esey, como Presidente di e comision, mi a pidi pa yama e stakeholdersnan di hospital na mesa pa scucha di nan mes cua ta e realidad, y despues stipula e pasonan di urgencia cu mester wordo tuma,” Tromp-Lee a declara.
Transparencia y solucion structural
E obhetivo principal di e reunionnan aki den e comision fiho ta pa haya un bista completo y cla di e situacion di HOH. A base di e informacion y e resultadonan di e combersacionnan cu e stakeholdersnan, lo tuma e decision pa invita e Minister di Salud Publico pa un reunion cu e comision of pa convoca un Reunion Publico (Openbare Vergadering – OV) si esaki resulta di ta necesario.
Tromp-Lee ta reitera cu e meta principal ta pa brinda claridad y trankilidad na e comunidad y na tur e personal di cuido. “Ora ta trata di salud di nos pueblo, no tin luga pa silencio ni pa tardansa. Nos mester di transparencia y nos mester di solucionnan structural pa garantisa cu nos hospital ta keda funciona di manera stabiel, sigur y pa bienestar di nos tur.”
