Cu apertura oficial di Aña Parlamentario 2026-2027 y discurso di su Excelencia Gobernador di Aruba, Gobierno a delinea e prioridadnan pa e periodo cu ta nos dilanti. Pa Minister sra. mr. Gerlien Croes, encarga cu Relacionnan den Reino, Educacion, Hubentud, Innovacion y Deporte, e discurso ta reafirma un vision cla: inverti den nos hendenan, modernisa nos pais y fortalece Aruba su posicion y cooperacion tanto den Reino como internacionalmente.
Un di e pilarnan importante menciona den e discurso ta educacion, considera como un di e inversionnan mas importante cu un pais por haci den su hendenan y den su futuro. Gobierno ya a tuma un paso significativo pa mehora e posicion economico-huridico di maestronan, mientras transformacion di educacion lo continua cu mira riba un sistema mas integra.
Profesionalisacion di maestronan, multilingualismo y siñamento durante henter bida ta forma parti esencial di e cambio structural aki. Na mes momento, e meta ta pa fortalece e conexion entre educacion, cuido, mercado laboral y responsabilidad pa nos pais.
“Transformacion di educacion no ta solamente trata di loke ta pasa den klas. Ta trata di prepara nos muchanan y hobennan pa bida, crea oportunidad pa nan talento por desaroya y duna nos profesionalnan den educacion e posicion y hermentnan necesario pa haci nan trabou,” Minister Gerlien Croes ta indica.
Un maneho integral pa nos hobennan
E Discurso di Gobernador tambe a pone enfasis riba necesidad di un maneho mas integral pa hubentud, conectando educacion, cuido, deporte, cultura y participacion activo den comunidad.
Atencion particular lo bay pa prevencion di criminalidad hubenil, fortaleciendo sosten pa hobennan y nan famianan y mehorando cooperacion entre e diferente instancianan envolvi. E meta ta preveni cu hobennan drenta den cadena hudicial y, na su lugar, crea oportunidadnan concreto pa nan por desaroya den un direccion positivo.
Segun Minister Gerlien Croes, prevencion mester bay man den man cu oportunidad.
“Nos mester ta presente prome cu un hoben cay. Educacion, deporte, cultura, guia y participacion den comunidad ta tur hermentnan cu por habri porta y duna un hoben perspectiva. E enfoke mester ta integral y pone e bienestar y futuro di e hoben central.”
Un Gobierno mas moderno, accesibel y eficiente
Modernisacion di aparato publico ta un otro prioridad importante pa Aña Parlamentario 2026-2027. E ambicion ta pa simplifica proceduranan, mehora coordinacion entre instancianan y logra cu tanto ciudadano como sector priva por conta cu servicio dentro di un tempo rasonabel.
Pa Minister Gerlien Croes, modernisacion y innovacion mester traduci den un diferencia concreto den experiencia di ciudadano cu Gobierno. Digitalisacion, mihor cooperacion y proceduranan mas eficiente ta parti importante di e transformacion necesario.
Aruba como socio fuerte den Reino, Europa y region
Den su ministerio di Relacionnan den Reino, Minister Gerlien Croes ta destaca tambe e importancia cu Discurso di Gobernador ta duna na Aruba su posicion den Reino Hulandes, su relacion cu Union Europeo y su conexion cu region.
Gobierno lo sigui intensifica cooperacion cu Hulanda, otro paisnan den Reino, Union Europeo y socionan regional, reconociendo cu e relacionnan aki por brinda oportunidad pa fortalece capacidad di Aruba, atrae conocemento y inversion y defende interesnan di nos pais.
E cooperacion aki, segun e vision presenta, mester ta basa riba confiansa, responsabilidad comparti y comprension pa realidad di cada pais.
“Aruba ta un socio cu tin su propio realidad, conocemento y fortaleza. Nos kier sigui construi relacionnan caminda nos por siña y beneficia di otro, pero caminda Aruba tambe ta aporta activamente. Cooperacion tin su mayor balor ora tur socio ta sinta na mesa cu responsabilidad y respet mutuo,” Minister Gerlien Croes ta expresa.
Construi Aruba di futuro
Pa Minister Gerlien Croes, e prioridadnan presenta pa Aña Parlamentario 2026-2027 ta conecta cu un meta comun: crea un Aruba cu ta inverti den su capital humano, brinda perspectiva na su hubentud, modernisa su institucionnan y ta fortalece su posicion como socio confiabel.
“Aruba di futuro nos ta construi awe. Cu educacion como fundeshi, oportunidad pa nos hobennan, innovacion den nos Gobierno y cooperacion fuerte cu nos socionan, nos ta sigui traha pa un pais cu no solamente ta cla pa ricibi oportunidad, sino tambe tin hopi pa aporta.”
