Minister di Deporte, sra. mr. Gerlien Croes, hunto cu Arubaanse Voetbal Bond (AVB), FIFA y Fundacion Lotto pa Deporte, ta anuncia oficialmente cu S.V. Caiquetio na Paradera ta e siguiente localidad cu lo forma parti di proyecto FIFA Arena Mini Turf. Cu esaki, Aruba ta haya su di tres mini turf FIFA Arena.
E anuncio ta marca un siguiente paso den e esfuerso pa acerca facilidadnan deportivo den nos barionan y crea mas oportunidad pa muchanan y hobennan practica futbol den un ambiente accesibel y adecua.
Pa Minister Gerlien Croes, expansion di e proyecto ta confirma e importancia di sigui inverti den infrastructura deportivo directamente den comunidad.
“Paradera ta na turno! Cu S.V. Caiquetio como e di tres localidad pa un FIFA Arena Mini Turf, nos ta sigui trece deporte mas serca dig nos muchanan y hobennan. Cada facilidad nobo ta representa mas oportunidad pa move, practica, descubri talento y desaroya pasion pa deporte,” Minister Gerlien Croes a expresa.
Proyecto FIFA Arena Mini Turf ta enfoca riba crea espacionan moderno y accesibel cu por contribui na participacion deportivo, recreacion y desaroyo di talento. Alabes, e facilidadnan ta crea oportunidad pa futbol sigui crece desde nivel di bario y club.
Minister Gerlien Croes ta enfatisa cu cooperacion entre Gobierno, AVB, FIFA y Fundacion Lotto pa Deporte ta esencial pa logra resultadonan concreto pa comunidad.
“Ora nos uni forsa, nos por transforma inversion den oportunidad concreto. Nos vision ta pa nos muchanan y hobennan tin mas facilidad cerca di nan, pa nan por practica deporte y sigui desaroya nan talento. Esaki ta deporte pa futuro.”
Cu inclusion di S.V. Caiquetio, e proyecto ta sigui amplia su alcance na Aruba, hibando e concepto FIFA Arena Mini Turf awor tambe na Paradera.
Minister Gerlien Croes ta felicita directiva, miembronan, boluntarionan, mayornan y comunidad di S.V. Caiquetio y henter bario di Paradera cu e anuncio.
“Pabien Paradera! Pabien S.V. Caiquetio! Aruba ta haya su di tres FIFA Arena Mini Turf. Mas facilidad, mas oportunidad y mas deporte pa futuro di nos muchanan y hobennan”.
