Minister di Turismo, Transporte y Labor, mr. Wendrick Cicilia, a reuni cu Head of TUI Dutch Caribbean, Antoine Klein Hofmeijer, pa dialoga ampliamente tocante e plannan pa aumenta conectividad aereo entre Aruba, Amsterdam y e mercado Europeo.
Durante e reunion, a confirma cu entrante april 2027, TUI lo aumenta su frecuencia entre Amsterdam y Aruba di dos pa tres vuelo pa siman. E expansion aki ta forma parti di e maneho di Minister Cicilia pa fortalece e posicion di Aruba den mercado Europeo y crea mas oportunidad pa atrae bishitantenan cu ta contribui na un turismo responsabel y sostenibel.
“Mercado Europeo ta recobrando relevancia y ta representa un oportunidad unico pa Aruba. E aumento di frecuencia di TUI ta crea un brug mas fuerte entre nos isla y Europa, mientras cu e ta sostene nos esfuerzonan pa diversifica nos mercadonan,” Minister Cicilia a declara.
Segun e minister, den ultimo añanan Aruba a registra un reduccion den cantidad di bishitante procedente di Europa. P’esey, Gobierno lo intensifica su esfuersonan y destina mas fondo pa stimula e mercado aki.
E bishitante Europeo ta cuadra cu e vision pa futuro di turismo di Aruba: un bishitante consciente cu ta aprecia y conserva naturalesa, ta keda mas largo riba nos isla y ta contribui mas ampliamente na economia local.
Durante e combersacion, Minister Cicilia y TUI a explora diferente iniciativa y areanan di colaboracion. TUI ta un socio importante pa Aruba pa mas cu 20 aña, tin presencia permanente riba nos isla y ta desempeña un papel vital den e cadena turistico y economia nacional.
Minister Cicilia a expresa satisfaccion cu e resultado di e deliberacion y a indica cu Gobierno lo sigui traha hunto cu partnernan strategico manera TUI pa aumenta conectividad, fortalece turismo y conkista mas oportunidad den mercado Europeo.
11 di september
