Na aña 1981 un total di 27 maestro a gradua na Academia Pedagocico Arubano como maestro. Desde e momento ey a crece un laso di colegialidad y amistad cu a perdura pa decadanan. Cada 5 aña e grupo ta uni y ta celebra esaki den diferente forma y no na Aruba so. Durante transcurso di añanan diferente colega a bay sosega lagando un bashi grandi den cada curazon pero toch gradecido na Señor di por a comparti momentonan memorable cu nan.
E grupo a haci diferente viahe hunto riba crucero pa nan 25, 30, 35 aniversario te ora cu covid a impede e viahamento y a keda celebra aki na Aruba mes. Esaki ta e caso e aña aki tambe y a dicidi di celebre aki mes diadomingo 6 di September cu un sacrificio di misa na
Iglesia Papa Juan Pablo II na Tanki Leendert unda pastoor a haci un bunita misa y a bendiciona e grupo. Despues a sigui un delicioso lunch na Palapa Restaurant na unda un donacion monetario, cu e mesun grupo a recolecta entre nan mes pa haci entrega di esaki na Sra. Rose-Marie Provence representante di e Fundacion Muchila Creativo. Di e manera aki APA$L ta dunando algo bek na comunidad pa cual nan hunto a traha y a dedica gran parti di nan bida educando nos hubentud..
Colegio Muchila Creativo ta cay bao di enseñansa secundario y cu por medio di Arte pa hobennan neurodiverso entre 12–25 aña ta ricibi nan educacion. E scol ta combina arte, practica, desaroyo di talento y crecemento profesional. E scol ta kere cu creatividad ta un idioma, arte ta un caminda, y e futuro ta un canvas unda cada studiante por pinta su propio storia. Na Colegio Muchila Creativo ta construí un tipo di educacion basa ariba tres pilar: inclusion, creatividad y desaroyo. E scol su filosofia ta cu cada hoben ta unico, cu e tin su propio ritmo, talento y storia. Arte ta forma e motor di enseñansa — un medio pa descubri, pa procesa y pa crece. For di e fundamento aki nos ta stimula desaroyo personal, cognitivo, social y profesional, pa cu cada studiante por desaroya su mes den un cuidadano creativo, consciente y firme. Studiantenan no ta siña solamente conocemento y habilidadnan, pero tambe ken nan ta y con nan por conecta cu otro persona. Nan ta desaroya riba tereno: • Personal: confiansa den nan mes, identidad y forsa social • Creativo: habilidadnan di arte, desaroyo di concepto y expresion • Profesional: actitud di trabou, experencia practico y orientacion pa futuro • Cognitivo: idioma, matematica, orientacion di mundo y alfabetisacion digital • Social-emocional: traha hunto, firme y empatia. Di e manera aki Muchila Creativo ta forma un ambiente di enseñansa unda cabez, curason y man ta siña hunto — un espacio unda tur talento tin balor y cada paso dilanti ta significa algo.
