Tin un tempo pa tur cos, y awor ta tempo pa claridad.” Cu e palabranan aki, parlamentario di AVP John Hart a anuncia cu el a manda un carta oficial na Minister di Energia, solicitando informacion tocante implementacion di e mocion pa un investigacion independiente riba tur acontecimento relaciona cu Refineria di Aruba (RDA) durante e periodo 2018–2025.
E mocion, presenta durante un reunion publico di Parlamento na augustus 2025, a expresa preocupacion serio tocante situacion financiero y operacional di RDA, maneho di e refineria y falta di informacion completo na parlamento.
Durante 2024, RDA a informa parlamento cu e compania y su entidadnan afilia tabata proyecta perdida di aproximadamente 14 miyon florin pa aña, situacion cu, segun e informacion presenta, ya tabata prolongando pa varios aña.
E mocion a menciona tambe cu gobierno a termina contrato cu Citgo, e anterior operador di refineria, na 2020. Sinembargo, Gabinete Eman-Wever-Croes I y II nunca a entrega na parlamento e acuerdo di terminacion ni e condicionnan cu RDA y Citgo a acorda.
Ademas, durante e añanan cu a sigui, gobierno a declara cu tabatin un lista largo di inversionistanan interesa pa opera e refineria. Tambe a anuncia plan pa construccion di un refineria modular y firma di un acuerdo pa un planta di LNG cu un balor considerabel. Segun e mocion, Parlamento no a ricibi e acuerdonan ni e condicionnan relaciona cu suministro di LNG, y tampoco a haya oportunidad pa revisa e documentonan pertinente.
Otro punto menciona den e mocion ta e ManCamp cu Citgo a construi riba tereno di RDA, originalmente pa hospeda cerca di 1.000 trahado. Despues cu RDA a bira doño di e facilidad, e ManCamp a wordo canibalisa casi completamente y actualmente ta den un estado deplorabel.
E mocion a señala cu na 2025 e refineria mes tabata den un condicion preocupante y deteriorando progresivamente. Pa varios aña, ekiponan di RDA tampoco lo no a wordo preserva adecuadamente conforme normanan internacional.
Parlamento a aproba e mocion, instruyendo Gobierno di Aruba pa laga realisa un investigacion completo e independiente —un full-fledged investigation— tocante tur e acontecimentonan cu a tuma lugar den RDA entre 2018 y 2025. E instruccion tabata pa inicia e investigacion dentro di tres luna y presenta e resultadonan na Parlamento.
Den su carta, Hart ta solicita Minister di Energia pa informa parlamento cua pasonan concreto gobierno a tuma pa ehecuta e mocion y si e investigacion a inicia oficialmente. Tambe e ta pidi claridad tocante cua instancia of expertonan independiente ta envolvi, e motibo pa cualkier eventual atraso y ki ora parlamento por spera e documentonan y resultado final.
“Parlamento a aproba un instruccion cla. Awor ta responsabilidad di Gobierno pa informa con e mocion ta wordo ehecuta. Pueblo tin derecho di sa kico a pasa cu e refineria, con recursonan publico a wordo maneha y cua decisionnan a wordo tuma durante e periodo aki,” Hart a expresa.
“Tin un tempo pa tur cos. Despues di tur e anuncionan, promesanan y preguntanan sin contesta, awor ta tempo pa gobierno duna claridad completo na Parlamento y na pueblo di Aruba,” parlamentario John Hart a conclui.
