Si pa un of otro motibo bo luz wordo corta, bo ta keda den scuridad, si bo no alcansa pone bo lus bek.
Scuridad den cas ta haci traficacion den cas dificil, nos ta cana trompica pasobra nos ta falta lus.
Awel mesun cos ta ora e amor di Dios y presencia di Dios ta haci falta den nos cas.
Y ora e amor di Dios y e presencia di Dios no tey e cas ta dividi.
Por ehempel un hende ta bini bo cas, e kier sinta combersa , pero den tur esey e ta expresa cu e no gusta e muher of e homber cu bo ta casa cune, na e momento ey bo tin cu avisa e persona ey cu boso dos ta uno ( Genesis 2:24) y cu e mester duna un splicacion ta di unda e ta bini cu e pensamento ey,pasobra e kier amistad, pero e ta cana cu division, mescos tambe si e ta referi na un yiu di bo.
Lucas 11:17 ta bisa hopi cla: Tur reino dividi contra su mes ta keda ruina, y un cas dividi contra su mes ta cay.
Hopi biaha hende no ta ripara cu rabia, odio y falta di pordon ta trece division den cas, y ora cosnan yega leu cu ta trece separacion den famia, nan ta bisa cu nan no sa kico por a pasa.
E amor di Dios y e presencia di Dios mester ta den nos cas y permanece den nos cas, no ta cos di un rato so, pero e mester tey constantemente.
Pero e por tey ora nos curason ta yen di dje, pasobra locual bo curason ta yena cune, bo boca ta papia.
Mateo 7:24 ta bisa : Ken cu tende e palabranan aki, di Mi y haci nan, lo wordo compara,cu un homber sabi,cu a traha su cas riba baranca.
Un homber sabi ta mantene su cas cu e amor di Dios, e ta cubri su cas bao di e Sanger di Cristo Hesus, e ta vigila, e ta haci oracion, e ta tene ayuno, pasobra e no ta cabes di cas solamente pa cuida famia y cubri gastonan, pero e ta cabes di cas responsabel sabiendo cu e mester duna cuenta na Dios, pasobra ta un mayordomo e ta.
Tur momento e mester ta cla pa guia su famia den caminda di union( Salmo 133)
Mustra nan e frutanan di Spirito Santo ( Galationan 5:22) ,
Corda nan cu mester pordona Mateo 6:14-15,
Sinja nan pone e bida bieu un banda ( Colosensenan 3:8-9)
Kita ofensa for di nan boca ( Efesionan 4:29).
Mantene e vinculo di pas (Filipensenan 2:1-2).
Soporta y pordona otro mescos cu Senjor a pordona boso.( Colosensenan 3:12-14).
Bo cas ta un teritorio bendiciona, cual no mester wordo contamina, pasobra ora bo cas ta wordo contamina e bida di tur esnan cu ta biba den e cas ey ta corre peliger di wordo contamina, corda bon un hende ta hanja griep, e ta tosa , y e ta niester, e no por yuda, si e otronan no cuida , den un dia nan tambe ta contamina cu e griep.
No laga bagamunderia di mundo contamina bo hogar, pasobra bo hogar ta teritorio di amor y presencia di Dios.Evita di papia cosnan negativo, palabra sushi, pornografia,palabranan di dobbel sinti, redo calumnia, orguyo y arogancia, pasobra e cosnan ey ta stroba e presencia di Dios den bo hogar y den bo bida.
Mantene un nivel halto di Alabansa y Adoracion den bo cas, laga tur momento Oracion bay boso dilanti.
Sinceramente, Pastor Marcel Balootje
