Durante Accion di Bario, Prome Minister Mike Eman a haya oportunidad pa combersa directamente cu residentenan Euleterio Koolman, Marcia Canela y Joseph Maduro, kende a comparti nan experiencia y punto di bista tocante diferente temanan cu ta importante den nan bida diario.
Den e combersacionnan, atencion a bay entre otro pa limpiesa y cuido di bario, importancia di participacion di comunidad y situacion di nos adultonan mayor.
Euleterio Koolman a destaca importancia di tene bario limpi y a haci un yamada pa comunidad pa coopera y cuida e ambiente rond di nan cas. E mensahe ta conecta cu e esfuerso cu ta sigui tuma forma via Cuida Aruba, caminda responsabilidad comparti entre Gobierno y comunidad ta prioridad.
Tema di pensioen tambe a sali durante e encuentronan. Un di e adultonan mayor a expresa satisfaccion cu e mehoracion cu a tuma luga, reconociendo cu e ajuste ta yuda. E reaccion ta refleha importancia di e pasonan cu Gobierno a tuma pa mehora posicion di pensionadonan y brinda nan mas sosten den nan bida diario.
Marcia Canela tambe ta hopi satisfecho cu e iniciativa di limpiesa y drechamento di e bario. El ta expresa gradicimento pa e atencion cu Gobierno ta duna na limpiesa di cayanan, bario y curanan, y ta mira e trabou cu ta tumando luga positivamente.
Punto principal ta un peticion concreto tocante siguridad den trafico. A menciona Caya Juancho Kock como un caya cu ta peligroso pa crusa, pasobra autonan ta pasa cu velocidad basta halto. Preocupacion principal ta tanto pa muchanan chikito como pa adultonan mayor.
P’esey, Marcia ta pidi Gobierno pa considera medidanan pa baha velocidad/controla trafico, cu posibilidad di plateau si ta posibel. Marcia ta expresa cu e ta contento cu Gobierno ta sali den comunidad y ta traha directamente pa pueblo.
Pa Premier Eman, Accion di Bario ta brinda precisamente e oportunidad pa no solamente tende tocante necesidadnan di comunidad, sino pa scucha directamente di residentenan con ahustenan di Gobierno ta realmente den practica.
E encuentronan cu Euleterio Koolman, Marcia Canela y Joseph Maduro a pone un cara humano riba e accion: residentenan cu ta aprecia e atencion pa nan bario, cu ta dispuesto pa contribui na un ambiente mas limpi y cu ta reconoce e pasonan cu a tuma luga pa sostene nos adultonan mayor.
Accion di Bario ta acerca Gobierno na comunidad, pa scucha, mira y sigui traha riba loke ta importante pa hende den nan bida di tur dia.
