Aruba mester un modelo moderno di inmigracion y integracion cu ta conecta cu e realidad di mercado laboral, crecemento y emehecemento di poblacion, capacidad di nos infrastructura y necesidadnan futuro di pais. Parlamentario John Hart lo pone e tematica aki riba agenda prioritario di parlamento.
Durante conferencia di prensa semanal di fraccion AVP, Hart a indica cu Parlamento no mester limita su mes na problemanan di awe, sino mester anticipa tambe riba retonan cu, si nan no wordo atende na tempo, por bira mucho mas grandi den e proximo dies añanan.
“Nos tin cu papia di e temanan dificil den parlamento. Nos mester debati problemanan actual, pero tambe anticipa riba e retonan cu por afecta e siguiente generacion. Ta importante pa parlamento sostene un debate tocante un modelo di inmigracion y integracion cu ta prepara Aruba pa futuro,” Hart a declara.
E parlamentario a referi na e rapport publica pa SER na 2025 y na cifranan di Centraal Bureau voor de Statistiek, CBS, cu ta mustra e papel importante cu migracion tin den desaroyo demografico di Aruba.
Durante e ultimo 50 añanan, crecemento di poblacion di Aruba a wordo determina principalmente pa migracion, ya cu e diferencia entre cantidad di nacemento y morto ta relativamente chikito. Entre 1988 y 2016, poblacion casi a dobla. Tambe tabatin periodonan di reduccion, particularmente durante momentonan di dificultad economico y durante e pandemia entre 2020 y 2022.
Na final di e segundo kwartaal di 2025, Aruba tabatin 109.435 habitante, un aumento di 0,9% compara cu final di 2024. E crecemento aki tabata principalmente e resultado di un aumento di 21,4% den cantidad di persona cu a migra pa Aruba, compara cu e mesun periodo di 2024.
Mercado laboral ta exigi vision
Hart ta reconoce cu Aruba actualmente tin necesidad di trahado den diferente sector. Embehecemento di poblacion ta pone mas presion riba mercado laboral, mientras sector hotelero, construccion y horeca ta sigui enfrenta necesidad grandi di suficiente personal.
Sin embargo, segun e parlamentario, falta un vision cla di gobierno riba inmigracion y integracion pa futuro.
“Ken nos mester? Cuanto hende nos tin mester? Pa cua sector? Pa cuanto tempo y bou di cua condicion? E preguntanan aki mester wordo contesta a base di informacion confiabel y un vision nacional,” Hart a enfatisa.
Aruba tin mester di ordo, direccion y un politica cu ta trata inmigracion di acuerdo cu e realidad di awe y mañan. Pais no por sigui reacciona solamente ora un problema ya a bira demasiado grandi.
Modernisa e LTU
Segun Hart, ta tempo pa revisa Landsverordening Toelating en Uitzetting, LTU, cu un mirada moderno. E LTU ta determina, den gran medida, ken por drenta Aruba, ken por keda y bou di cua condicion.
E esencia di e debate no mester ta simplemente “mas of menos inmigracion”. E pregunta fundamental ta cua tipo di trahado y talento Aruba tin mester, cuanto persona tin mester, bou di cua condicion nan por traha y biba na Aruba, y si nan estadia ta temporal of pa un periodo mas largo.
“Aruba di awe no ta e Aruba di decadanan pasa. Nos economia, poblacion y mercado laboral a cambia. E sistema di inmigracion tambe mester cambia. Nos no por combati ilegalidad na un banda y, na e otro banda, permiti cu dunadornan di trabou beneficia di un sistema cu ta pone hende den vulnerabilidad,” Hart a expresa.
Inmigracion y Integracion Simultaneo
Pa Hart, e debate mester bay mas leu cu solamente toelating y uitzetting. Un modelo completo mester inclui registracion adecuado, necesidadnan di mercado laboral, integracion, vivienda, control, aplicacion di ley y retorno ora estadia termina.
Un politica moderno mester brinda claridad tanto na e persona cu ta bin traha na Aruba como na dunadornan di trabou y instancianan encarga cu control. Alabes, e mester proteha trahadornan contra abuso y evita cu un sistema debil contribui na ilegalidad, explotacion of mas presion riba servicio publico.
Hart lo trece e tematica aki den comisionnan parlamentario cu meta di inicia un debate amplio, basa riba cifra y participacion di instancianan relevante.
“Aruba no por sigui laga inmigracion core riba piloto automatico. Nos mester un modelo cu ta brinda direccion, responde na necesidad di nos economia, promove integracion y proteha tanto nos comunidad como e personanan cu ta bin contribui na nos pais,” parlamentario John Hart a conclui.
