E compositor Arubiano Glenda Zavala Maduro a ricibi un reconocemento historico pa su trayectoria y dedicacion na e genero di vallenato. E organisacion YH Music Valledupar a declara su vivienda oficialmente como e prome “cas bibo” di e folklore aki, tanto na Aruba como den exterior.
E distincion aki ta duna balor na e añanan largo cu Zavala a dedica na e genero musical. Cu e iniciativa di YH Music, e residencia no solamente ta keda como su hogar, sino cu tin e meta pa bira e prome cas museo di vallenato riba e isla.
Den e espacio aki lo expone:
- Cancion y obranan di su autoria
- Recuerdo di su participacion den diferente festival
- Eventonan realisa durante su carera
- Instrumentonan primordial di vallenato, cu e proposito adicional di sirbi como centro di enseñans pa esnan cu kier domina nan uzo
Cu e paso aki, Zavala ta bira e prome figura cu su cas ta forma parti di e proyecto internacional aki. Pronto lo anuncia e fecha oficial caminda lo devela e plachi conmemorativo cu ta ratifica su hogar como e prome cas bibo y museo di vallenato na Aruba.
