Ora e Palabra di Dios ta bisa y ta sinja nos cu den Matrimonio dos ta bira un carni, esey ta nifica: Cana hunto y stop di competi., esey ta nifica un carni.
Pasobra e enemigo di nos alma cual ta e diabel, ta capas pa trece hasta envidia entre pareha, Pustamento:
Un ta traha duro aki banda y otro ta gasta tur cos aya banda,
Un ta responsabel y e otro no tin cuenta,
Un ta spaar y e otro no ta interesa pa spaar,
Un ta cumpra pa loco, y e otro ta cumpra segun e tin mester,
Un ta cobra Diamars y Diarazon atardi e no tin nada,
Mientras cu e otro ta pone algo un banda pasobra luna ta largo ainda, y mester sigi biba te ora fin di luna yega.
Un ta biba cu budget, pero e otro no traha ni un lista ora e ta bay supermarket.
Un kier cumpra panja tur luna pa demostra cu e ta traha , mientras cu e otro, ta cumpra temporalmente.
Ora nos ta bisa cu nan dos ta uno, ta nifica cu ora un ta malo e otro ta cuida e. ora un tin necesidad e otro ta para banda di dje, ora uno ta yora , tur dos ta yora, ora uno ta celebra e otro tambe ta celebra, tur esey ta bini pasobra nan ta den un union cu Dios.
Nan no por ta rancando otro, biba huntu sin cooperacion. Djis duna un ehempel, un ta cushina y e tro ta laba tayo, hunto nan ta haci cas limpi, hunto nan ta lesa nan Bijbel y hunto nan ta haci oracion.
Pasobra hunto no ta nifica riba cama so, solamente sexualidad y intimidad, hunto ta nifica responsabilidad, sometemento, respet, dedicacion, proteccion, y temor di Dios.
Hunto ta nifica cu mescos cu nos a priminti na otro, nos a primiti na Dios tambe, pasobra no ta placa ni bunitesa ta uni nos hunto, pero ta e amor cu Dios a uni nos cune esey ta mantene nos hunto.
Matrimonio ta demostra e amor di Cristo Hesus pa su Iglesia, un amor incomparabel, cu no ta barata, pero un amor den cual Cristo a demostra cu su bida cu E ta stima.
Ta bon pa nos sociedad henter, para keto un rato un puntra na unda nos ta bay cu tanto divorcio.
Si acaso ya nos no ta balora locual Dios ta halsa, y cu nos no ta stima locual Dios ta stima, pasobra cada matrimonio kibra ta un golpi pa nos sociedad. Hasta si e pareha no tin ningun yiu, e ta haci dolor pasobra matrimonio ta pilar di sociedad.
Mientras cu nos ta cuida economia y naturalesa, matrimonio ta un di e prome cosnan cu mester wordo cuida y honra, pasobra for di eynan ta sali famia, y yiunan cu mester ricibi bon ehempel for di nan mayor, pasobra educacion ta cuminsa na cas, y si na cas no tin nada, riba caya tampoco e por wordo haya.
Genesis 2:24.
Mateo 19:5,
Marco 10:18.
Efesionan 5:31
1 Corintionan 6:16.
Hebreonan 10:4.Ta palabra di Dios pa conscientisa hende , y pone hende comprende cu matrimonio no ta djis dos palabra, e ta un institucion di Dios, ta Dios mes a establece matrimonio, for di ora cu Dios a mira cu no ta bon pa e homber ta su so, pesey e a pone un muher banda di dje.
Y nan dos lo ta un carni, pa por ta bendiciona y asina tambe nan por bendiciona otronan.
Y nan hogar lo ta bendiciona tur momento..
Sinceramente, Pastor Marcel Balootje
