Un momento di fiesta y orguyo, pero tambe un momento cu ta simbolisa futuro di Aruba, asina
parlamentario di PPA, Eduard Pieters, ta mira instalacion di e Parlamento Hubenil nobo, caminda varios hoben a huramenta y otro a asumi posicion nobo dentro di e Parlamento Hubenil.
Pa Pieters, importancia di Parlamento Hubenil no ta limita na politica. E ta un espacio, unda Aruba ta forma e hobennan cu mañan por carga responsabilidad den diferente sector di nos sociedad. “Nos ta trahando riba e lidernan di futuro. Nos ta trahando riba e hobennan cu lo bay carga, maneha y defende e pais aki.”
E lidernan pa henter sociedad
Segun Pieters, no necesariamente e hobennan aki lo termina den politica. Entre nan por tin un futuro director di un compania, un lider den deporte, den un organisacion social of economico, of den cualkier otro posicion di responsabilidad. Pa Pieters, esaki ta e balor grandi di Parlamento Hubenil: forma liderazgo cu Aruba lo tin mester mañan, den tur capa di nos sociedad.
Un huramento cu ta carga responsabilidad
Pero tabatin un momento cu pa Pieters tabata particularmente significativo: e huramento cu e hobennan a haci. Nan a compromete nan mes pa salvaguardia derecho di mucha y derecho humano universal di mucha. Pieters a compara e momento ey cu e responsabilidad cu e parlamentarionan mes a acepta, ora nan a haci nan propio huramento. “Ta un ehempel pa nos como Parlamento y como parlamentarionan, ora cu nos tambe a huramenta pa salvaguardia y defende nos Statuto, Constitucion y nos leynan local.”
Pa Pieters un huramento no ta simpelmente parti di un ceremonia. E ta un compromiso di e responsabilidad cu un posicion publico halto ta trece cu ne. P’esey como Parlamentario no por laga ningun ley di afo pero tampoco ley di Reino manera HOFA mina y haci daño na nos Constitucion.
E defensornan di Aruba di mañan
Pieters a expresa su orguyo di por a presencia e instalacion y mira e hobennan asumi nan responsabilidad. Pasobra pa Pieters e generacion cu awe ta sinta den Parlamento Hubenil, por ta e mesun generacion cu mañan lo mester carga Aruba.
“Nan ta bay ta nos futuro. Nan ta bay ta e defensornan di nos patria, defensor di Aruba cu nos tur ta stima, defensor di nos leynan, nos Constitucion y nos Statuto di Reino.”
Esey ta haci Parlamento Hubenil importante: no solamente pa futuro di politica, sino pa futuro liderazgo di Aruba den sentido amplio.
Pieters a termina felicitando tanto e parlamentarionan y ministernan hubenil y esnan cu lo ta voz di hubentud. Kisas hopi ta wak e momento aki como un momento poco significativo, pero e tin un mensahe potente y un responsabilidad grandi tras di dje: e hobennan cu awe ta siña pa lidera, mañan ta esunnan cu lo carga Aruba.
