Ministerio di Relacionnan den Reino, Educacion, Hubentud, Innovacion y Deporte ta tumando pasonan concreto pa locual ta trata fase 2 di ahuste salarial pa veld di educacion. Durante e fase aki, diferente departamento ta trahando ariba simplificacion di e structura di salario pa e docentenan. Banda di esaki, tambe nan ta trahando riba un maneho di renumeracion basa riba profesionalisacion continuo, un investigacion tocante e uzo di e edad maximo pa crecemento di salario, incluyendo e scala di docente y tambe di asistentenan di klas. E asistentenan di klas cu actualmente ta den un scala di docente, tambe lo ricibi un aumento di salario den fase 2.
Desde maart 2026 tabata tin diferente encuentronan semanal entre Departamento di EnseƱansa, DRH y ministerio pa ehecuta e structura aki. Tambe tabata tin na comienso di maart e prome encuentro cu sindicatonan como audiencia pa duna input ariba e diferente funcionnan y areanan caminda veld ta desea di mira un cambio den e structura salarial.
Den luna di juni diferente stakeholder a reuni pa duna input riba posibilidadnan den e descripcion di funcionnan (functiebeschrijvingen), y dia 2 di juli 2026 un di dos session di audiencia cu sindicatonan a tuma luga pa por cuminsa finalisa e proceso aki pa asina por yega na un descripcion di funcion nobo. Den luna di augustus a tuma luga un ultimo session cu stakeholders pa asina finalisa e descripcion di e funcionnan. Na e momento cu e concepto di e descripcion di funcion ta cla, lo presenta esaki na veld di educacion pa asina por valida esaki. Recientemente, na comienso di luna di september a reuni un biaha mas cu DRH, Departamento di EnseƱansa, Sindicatonan y Ministerio.
Como parti di e proceso aki lo tene cuenta cu, entre otro, e grandura di e klasnan, fortificacion di e structuranan di cuido pa studiante y docente, profesionalisacion di docente, y e posibilidad pa introduci modelonan pedagogico-didactico cu ta acopla na e necesidadnan di siglo 21.
Mehoracion di e calidad di educacion y stimulacion di innovacion ta forma parti di un plan strategico y holistico pa fortalece cada componente di e sistema di educacion. E reforma di salario pa docentenan ta un di e puntonan primordial pa alcansa e meta aki. Fase 1 di e reforma aki a keda formalisa cu aprobacion di e presupuesto pa aƱa 2026 y e reunionan desde maart te cu aworaki ta e base pa por ehecuta fase 2 di plan aki cu lo mester inicia despues di 2028. Na mes momento, 1 di januari 2028 e di dos pago di fase 1 lo tuma luga.
