Un falta di seriedad total den Parlamento y un falta di respet pa e rol di control di nos representantenan di pueblo. Awe, durante e debate riba e sugerencianan pa cambio di e Landsverordening normering topinkomens (LNT), nos a presencia con e fraccion di coalicion a prefera di core pidi pa schors e reunion, na momento cu e discusion a bira “cayente” y cu e gañamento di Minister Wever a keda exponi den e sala di Parlamento.
E realidad ta cu Minister Wever a presenta dilanti Parlamento gañando abiertamente riba e conseho di Directie Wetgeving en Juridische Zaken (DWJZ/2026/811):
- Minister Wever ta gaña cu DWJZ a conseh’e pa hiba un “begunstigend beleid”: Esaki ta FALSO. Den e conseho oficial di DWJZ no ta para ningun caminda cu e Minister por desvia di e ley anticipando cambionan na caminda. Loke DWJZ a aconseha ta pa cambia e ley via e proceso legislativo debido den Parlamento y pa respeta e ley existente (incluyendo articulo 12 di LNT). Minister Wever no por inventa un “begunstigend beleid” pa pasa riba un Landsverordening cu ta na vigor.
- Minister Wever ta gaña cu el a haci un evaluacion caba: Esaki tambe ta FALSO. DWJZ ta explicito den su conseho na pagina 5 y 6 cu mester instala un Comision di Experto independiente pa haci e evaluacion aki riba e efectividad di e ley den practica. Minister Wever no por pretende cu e carta cu el a manda stakeholders dia 21 di augustus 2026 y nan reaccionnan ricibi den luna di september 2026 ta ekivalente na un evaluacion profesional y independiente manera cu DWJZ a prescribi.
E berdadero motibo pakico e coalicion a drenta den panico y a pidi pa schors e reunion, ta pasobra colega De Meza di coalicion (AVP) tabata na caminda pa presenta un mocion pa manda Minister Wever haci su huiswerk. E coalicion a haya miedo pasobra e mocion aki, cu e sosten di oposicion, lo a significa un berdadero brevet van onvermogen pa Minister Wever den pleno sala di Parlamento.
Y manera semper, cada biaha cos bira cayente y no tur 12 parlamentario di e Fraccionnan di AVP-Futuro ta riba un liña, nan ta core schors e reunion.
Un comedia politico
En bes di haci nan trabou y deal cu e berdad legal, e coalicion a opta pa schors e reunion supuestamente pa Minister bay haci e evaluacion… e mesun evaluacion cu Minister Wever a declara un rato prome cu el a haci caba! Esaki ta un ridiculez total. Ta bon pa pueblo sa cu ta e propio Lider di Fraccion di Futuro a lanta bisa cu mirando cu minister mester bay haci evaluacion, lo ta miho pa schors e reunion y lag’e bay haci e trabou en cuestion. Un hilaridad politico!
Esaki ta un falta di seriedad den Parlamento. Nos no por permiti cu ta uza e mecanismo di schorsing pa corta e discusion, huy for di e control parlamentario y evita votamento riba mocionnan cu ta refleha e sintimento real di e representantenan di pueblo.
Mi ta haci un yamada cla y firme:
- Transparencia total: Minister Wever mester stop di gaña y di quote e conseho di DWJZ fuera di su texto real.
- Respet pa e competencia di Parlamento: No por kita of flexibilisa e LNT sin cu tin un marco alternativo y concreto (manera e ley di Corporate Governance) cu ta drenta na vigor prome, y sin cu Parlamento ta mantene su derecho di aprobacion previo y di control.
- Continuacion inmediato di e reunion: E reunion mester keda reanuda sin mas tardansa pa debati y vota e mocionnan cu ta poni riba mesa.
Ora bo tin argumentonan legal y berdad di bo banda, bo no tin mester di core schors reunion. Pueblo merece berdad, transparencia y un Parlamento cu ta haci su trabou di control cu firmeza.
