Durante e sesion parlamentario tocante normering di topinkomens, parlamentario di AVP Clifford Heyliger a destaca cu Aruba mester haya un balans entre responsabilidad den gasto publico y e necesidad di ofrece condicionnan competitivo pa atrae y retene profesionalnan cu e pais tin mester.
Heyliger a recorda cu durante pandemia di COVID-19, Hulanda a exigi Aruba pa introduci un maximo salarial, tanto pa alto funcionarionan publico como pa directivonan di empresanan di gobierno. Un medida basa riba e situacion na otro islanan y aplica sin tene suficientemente cuenta cu e realidad y nivel di desaroyo specifico di Aruba.
“E tempo ey mi no tabata den politica, pero for di sindicalismo caba mi a indica cu mi tabata contra e medida. Mi preocupacion tabata cu e lo afecta e kader profesional di cada empresa y haci mas dificil pa nos empresanan competi cu otro organisacionnan den region y pafor di region,” Heyliger a declara.
Segun e parlamentario, Aruba ta un pais altamente desaroya. Pa conserva e nivel aki y sigui progresa, Aruba tin mester di profesionalnan competente na tur nivel, for di posicionnan operacional te na middle management y directiva. “Nos ta papia hopi tocante diversificacion economico y tocante e siguiente paso cu Aruba mester tuma. Pero con nos por logra esaki si organisacionnan no por atrae of retene e profesional Arubiano cu nan mester, pasobra Merca, Europa y hasta paisnan den Latinoamerica por ofrece nan un mihor pakete?” Heyliger a puntra.
El a indica cu e mes a papia cu profesionalnan Arubiano cu entre 20 y 30 aña, cu tin gana di regresa Aruba, pero cu despues di evalua e pakete laboral ta conclui cu esaki no ta competitivo. Beneficionan cu ta standard na Hulanda y otro parti di mundo, na Aruba hopi biaha ta dificil of hasta imposibel pa ofrece.
Nos no por sigui laga di reconoce e balor di nos profesionalnan local. Autoridad mester bay hunto cu responsabilidad, pero responsabilidad tambe mester refleha den remuneracion. Si un persona ta carga un nivel halto di responsabilidad, e salario mester ta na proporcion cu esey,” Heyliger a expresa.
Segun Heyliger, Aruba tin cu stop di converti tur asunto den un wega politico. El a expresa decepcion cu partidonan den oposicion ta presenta e flexibilisacion di e norma como un intento pa kita trabou for di Arubiano y duna esaki na stranhero. “Nos mester inverti den nos propio hendenan, duna nan oportunidad pa crece y crea condicionnan pa nan kier keda na Aruba of regresa despues di a acumula experiencia afo. Si nos no por ofrece un pakete competitivo, nos mes ta cerando porta pa talento Arubiano,” el a declara.
Heyliger a critica e postura actual di MEP, señalando cu durante pandemia e anterior gobierno a acepta e condicionnan di Hulanda pa por ricibi financiamento relaciona cu Landspakket, incluyendo e normering salarial cu awe e partido ta cuestiona for di oposicion.
“Na e momento cu nan tabatin responsabilidad di goberna y defende e posicion di Aruba, nan a bay di acuerdo cu e exigencianan. Awe cu nan ta den oposicion, nan ta presenta nan mes como defensor di e trahador Arubiano. Politica mester ta consistente. Si bo a tuma un decision, bo mester asumi responsabilidad y para p’e,” Heyliger a enfatisa.
Segun e parlamentario, pueblo a expresa su desaprobacion di e rumbo anterior, entre otro pasobra e surplus financiero anuncia no tabata suficientemente refleha den e realidad diario di ciudadano. E actual gobierno a cuminsa dirigi recursonan bek pa comunidad mediante sosten pa pensionadonan, schooltoelage y otro beneficionan, mientras e siguiente meta ta pa acerca salario minimo na e nivel minimo necesario pa subsistencia.
