Durante e tratamento di e Landsverordening Normering Topinkomens (LNT), a surgi dudanan serio riba e declaracion di Minister di Finansas Geoffrey Wever tocante e excepcion cu e Gobierno a duna na Aruba Airport Authority (AAA) na november 2025.
E excepcion pa e salario di e CEO di Schiphol/AAA a wordo duna a base di articulo 12 di e LNT y a wordo ancra den un decreto (Landsbesluit). Gobierno a usa e posibilidad di excepcion cu ley ta ofrece.
Durante e debate, Minister Wever a bisa prome cu articulo 12 no por worde aplica pa duna excepcion na otro directornan, pasobra e aplicacion di e articulo aki lo ta incorrecto. Ora oposicion a confronta e Minister cu e decreto di AAA/Schiphol, su splicacion a cambia: segun e Minister, no ta e Landsbesluit tabata incorrecto mas, sino e ley di LNT mes tabata incorrecto. Pa MEP, e declaracionnan aki no ta cuadra.
E pregunta fundamental ta: si articulo 12 no ta correcto, riba cua base legal nan a duna e excepcion na AAA/Schiphol? Y si e excepcion tabata legal, pakico e ley di LNT mester worde cambia di e forma aki awor?
Ora oposicion a confronta e Minister cu e contradiccionnan den su declaracionnan, e reunion a worde suspende riba peticion di e fraccion FUTURO, cu AVP a apoya.
Oposicion a anuncia cu lo prepara un mocion di desconfiansa contra e Minister ora e reunion continua, basa riba tur e inconsistencianan den su declaracionnan.
Pa MEP, e asunto aki ta bay mas leu cu solamente e ley di LNT: un Minister mester duna Parlamento informacion completo, consistente y confiabel. Sin esey, Parlamento no por haci su tarea di control.
MEP ta exigi claridad completo riba e excepcion di AAA/Schiphol, su base legal y e declaracionnan contradictorio di e Minister.
