Pa por stimula un sector priva fuerte y sostenibel, ta importante pa entrepeneurs no solamente tin un bon idea, sino tambe e conocemento y hermentnan necesario pa maneha, desaroya y laga nan empresa crece.
Cu esaki na mente, Directie Economische Zaken, Handel en Industrie (DEZHI), via su unidad IDEA, ta continua cu Fase 3 di Masterclass Entrepreneurship, bou di e tema “Manage Your Business.”
Diamars 29 di september 2026, IDEA lo organisa e prome workshop di Fase 3, titula “Ready to Grow: Managing Your Finances & Employee Insurance.” E workshop ta dirigi na tanto comerciante existente como futuro comerciante na Aruba y lo enfoca riba dos aspecto esencial di maneho di un negoshi: maneho financiero y seguro di empleado.
Minister di Finansa, Asunto Economico y Sector Primario, Geoffrey Wever, ta enfatisa cu acceso na conocemento y informacion practico ta un parti importante di e esfuersonan pa sigui fortalece sector priva na Aruba y pa ekipa entrepeneurs mas miho posibel.
“Nos kier stimula hende pa drenta e mundo di comercio, pero nos mester tambe ekipa nan cu e conocemento pa construi un negoshi cu ta para riba un fundeshi solido. Un comerciante mester comprende su finansas, conoce su responsabilidadnan como empleador y tin e hermentnan pa haci decision cu ta contribui na crecimiento sostenibel di su negoshi”
Fase 3 di Masterclass Entrepreneurship ta enfoca riba fortalece conocemento y habilidadnan practico di comerciante den tereno di maneho, cu diferente topiconan. E meta ta pa comerciante ta miho prepara pa maneha y sigui desaroya nan negoshi di forma responsabel, eficiente y sostenibel.
E necesidad pa sigui inverti den e tipo di conocemento aki ta importante. Segun e plan di e workshop, hopi comerciante cu ta cuminsa y existente no semper tin suficiente conocemento practico tocante maneho financiero y seguro di empleado. Esaki por resulta den decision financiero menos efectivo of falta di conocemento tocante e obligacionnan cu ta surgi ora un ta emplea personal.
Durante “Ready to Grow”, Edward Erasmus, di Erasmus Consulting & Training lo trata e tema “Managing Your Finances”, mientras Cristian Garcia di SVb lo brinda informacion tocante “Employee Insurance: What Every Employer Needs to Know.” E workshop tambe lo brinda espacio pa pregunta y discusion interactivo, pa participante por obtene informacion y orientacion directamente di experto.
Minister Wever ta gradici e teamnan di DEZHI, IDEA y EXPRODESK pa nan esfuerso continuo pa contribui na desaroyo di sector priva y pa sigui crea oportunidad pa comerciante local amplia nan conocemento y capacidad.
“Sector priva ta un motor importante di nos economia. Ora nos inverti den conocemento di nos comerciante nan y esnan cu ta desea di drenta e mundo di comercio, nos ta inverti den sector priva mas fuerte, empleonan mas sostenibel y un economia cu mas capacidad pa crece.”
E workshop “Ready to Grow: Managing Your Finances & Employee Insurance” ta tuma luga diamars 29 di september 2026, di 9:00 a.m. pa 12:00 p.m. na Cas Veneranda. Cupo ta limita y comerciante existente y futuro comerciante cu ta interesa ainda por registra via e pagina oficial di e evento.
