Durante un reunion di Parlamento riba cambionan den e Landsverordening Normering Topinkomens (LNT), Parlamentario Dangui Oduber a cuestiona Minister Geoffrey Wever y Gobierno fuertemente tocante e maneho di excepcionnan bou di e ley aki. E parlamentario a pone enfasis riba e gran diferencia cu tin entre e trato preferencial cu e CEO di Aruba Airport Authority (AAA) a ricibi y e trato cu awor ta wordo poni riba mesa pa profesionalnan local.
Dobel standard di Gobierno den trato entre profesionalnan local y di exterior
Segun Oduber, e mandatario a presenta ayera den sala di Parlamento pa pidi opinion (gevoelens) tocante cambionan den e LNT dirigi riba profesionalnan local, cuestionando unda e mesun urgencia y atencion ey tabata ora Gobierno a tuma e decision rond di e CEO di Schiphol na Aruba Airport Authority (AAA) na november 2025. El a remarca cu den e caso ey no a pidi aprobacion ni opinion di Parlamento prome, sino a otorga un salario di 1.2 miyon florin, mientras cu lamentablemente a exclui cualkier otro profesional local na AAA di por a bin na remarc’e pa un excepcion similar.
Ademas, e parlamentario a subraya cu Parlamento a keda na altura di e Landsbesluit di november 2025 pa medio di un publicacion oficial so, cuestionando pakico un asunto asina importante no a wordo treci na Parlamento prome. El a bisa cu: “Pa un profesional di exterior Gobierno por a actua y desvia di e ley di LNT, pero awor cu ta trata di profesionalnan local, e Minister kier sa prome kico Parlamento ta pensa. E ta bisto con Gobierno ta trata su propio hendenan.”
Accion ta Papia mas cu Palabra
Segun Oduber, Gobierno mester splica claramente cua criterio ta wordo uza pa determina ken ta haya un excepcion bou di LNT y ken no, cuestionando pakico e propuesta cu tin riba mesa na Parlamento no ta duna ATA y IMSAN e flexibilidad cu nan posicion specialisa ta exigi: Ken ta dicidi ken si y ken no? Cua ta e criterionan? Pakico ATA no? Pakico IMSAN no? E decisionnan aki no por ta basa riba un decision arbitrario. Mester tin criterio obhetivo, transparente y defendibel.
Pa e parlamentario, specialmente e dos institucionnan aki merece un analisis profundo, ya cu ATA mester opera den un mercado turistico internacional competitivo, mientras cu IMSAN mester por atrae y retene profesionalnan medico specialisa. Oduber a subraya cu: “Nos por pone norma y control, pero nos no por crea un sistema cu eventualmente ta limita nos propio institucionnan pa competi pa talento. E Minister mester demonstra cu e decision di no inclui ATA y IMSAN no lo perhudica nan capacidad pa funciona.”
Otro Decisionnan Grandi tambe mester di Transparencia
Oduber a compara e situacion aki cu su critica anterior riba e proceso di e Rijkswet HOFA: “Minister a bisa ayera cu e mester bin Parlamento prome pa tende e gevoelens riba e topico di LNT. Pero e mesun principio di participacion parlamentario mester conta ora ta trata otro decisionnan grandi cu tin un peso directo riba e autonomia y futuro financiero di Aruba.”
Segun e parlamentario, Gobierno no por aplica participacion parlamentario solamente ora e ta conveniente. E reglanan di democracia mester ta consistente; Parlamento su rol y participacion no por wordo balora y consulta den un caso si, y den otro no.
“Transparencia no ta algo cu bo ta aplica dependiendo di ken ta para dilanti bo. Si nos kier un sistema creibel, e mesun regla, e mesun transparencia y e mesun responsabilidad mester conta pa tur hende,” Oduber a conclui.
Ser arubiano no por traha contra bo den bo mesun cas.
E contraste ta bisto: Gobierno ta facilita excepcionnan den ley pa un CEO di exterior na AAA gana 1.2 miyon florin sin pidi gevoelens na Parlamento, mientras cu pa nos propio profesionalnan local ta nenga di haci e cambionan necesario. Un maneho asina ta un muestra cla di un Gobierno cu ta maltrata, falta respet y discrimina su mes hendenan.
