Minister Wever ta pidi “gevoelens” di Parlamento riba e direccion politico cu Gobierno kier tuma cu Ley di Normering Topinkomens, conoci como LNT.
LNT a wordo introduci na 2022 como un condicion cu Hulanda a pone pa e sosten di likides cu Aruba a ricibi durante e crisis di COVID-19. E meta di e ley ta pa limita e salarionan excesivo den sector publico y semi-publico, specialmente cerca funcionarionan na nivel halto. Sinembargo, den practica, LNT a trece diferente problema; varios instancia y compania a cuminsa caso legal contra aplicacion di e ley, y e necesidad tey pa e ley wordo clarifica of drecha.
Un reunion sin preparacion y falta di informacion
Minister Wever ta propone pa haci cambio den LNT pa, entre otro, saca diferente compania y entidad for di e alcance di e ley. Sinembargo durante e reunion a bira bisto cu Minister Wever no tabata debidamente prepara pa e debate necesario. E mandatario tabata falta hopi informacion relevante.
Por ehempel, Parlamento no a haya un evaluacion di e funcionamento di e LNT desde cu e ley a drenta na vigor. E Minister no a splica riba e casonan contra LNT, cuanto nan ta, ki punto legal a wordo discuti, cual a wordo gana of perdi, kico ta e consecuencia huridico y financiero di cada decision, cual parti specifico di e LNT mester wordo drecha y cual instancia lo keda cay bou di e LNT ora cambia esaki. Pues yen informacion relevante pa Parlamento por forma un opinion responsabel, a keda falta.
Necesidad di analisis y data valido
Ta trata aki di un ley cu ta afecta maneho di placa publico, salario di top funcionarionan y confiansa den administracion publico. Pa e motibo ey, cualkier cambio mester ta basa riba analisis, dato y conseho huridico y financiero, y no solamente riba un deseo politico.
Parlamentario Maduro ta enfatisa cu LNT por mester wordo drecha, pero e cambionan mester trece mas claridad, igualdad y seguridad huridico. Si Gobierno saca casi tur entidad importante for di e ley sin un evaluacion debido, e riesgo ta cu LNT lo perde su proposito y efectividad.
“Minister Wever no a bin Parlamento cu e informacion necesario. E reunion mes a confirma cu Gobierno ainda tin hopi trabou pa haci riba e tereno aki. Prome cu Parlamento por tuma un posicion responsabel, e Minister mester presenta un evaluacion completo, e resultado di tur e casonan legal y un propuesta concreto cu ta mustra exactamente kico lo cambia, pakico y pa ken.”
Pueblo tin derecho di sa con placa publico y salarionan den sector publico ta wordo proteha. Un ley asina importante no por wordo cambia sin debido informacion. E proceso mester ta transparente, debidamente prepara y legalmente corecto.
