Adiccion, no ta un wega, adiccion ta un dolor, ora un hende ta adicto di berdad e ta perde tur cos.
Na prome lugar esnan cu ta bende droga no tin curason, ta solamente placa nan ta wak, y nan no tin consenshi di esnan cu ta wordo destrui fisico, mental y spiritualmente.
Ora un hende ta adicto na droga of alcohol y tambe wega di placa e ta esclavo of catibo di hende y di diabel, e ta perde dominio propio, conscientemente e ta cumpra malesa y problema pa su curpa.
Pa un hende wordo libra di droga e mester di yudansa di Dios, y dominio propio, sino e no ta sali di e cos ey.
Hopi biaha nos ta tende hende bisa cu ta e ambiente di e bario.
E cas cu e ta biba aden,
Ta algo cu ta den famia,
Ta e muher cu e tin ta pone droga.
Ta e homber cu e tin ta pone droga.
Ta e amigonan cu e ta cana cune.
Tur e cosnan ey ta haci influencia riba un persona ora e no tin dominio propio, cual ta locual hende ta perde ora e ta usa cualkier tipo di droga.
Pero tambe nos tin hopi abusador den comunidad kende sa masha bon, con hambra un adicto por bira pa placa ora e kier usa droga, y ta pone e adicto laba auto, chapi cura,of haci trabao cu dos hende of mas mester haci y ta page cu cinco, dies of binticinco florin, of hasta cu droga mes , pa nan hanja nan trabao haci. Esey no ta yudansa, esey ta abuso.
Ora un hende ta den un Centro di Rehabilitacion , despues di un paar di luna e ta clean fisicamente pasobra e no ta usando ningun substancia, esey ta keda nota door di e curpa cu tabata kibra ta wordo restaura door di sosiego y come na tempo.
Despuen cu ayudo di e Palabra di Dios, y bon conseho e mente ta bini bek na comprondemento, pasobra e displina di bida mester wordo aplica bek, pasobra adiccion ta enemigo di displina, y coreccion.
Un hende mes no ta nota tur locual cu e ta perde poco, poco segun e permiti adiccion tuma dominio di su bida.Y e dominio propio ta necesario pa sali for di adiccion, y no laga hende lubida cu Dominio Propio ta bini di Dios, y no di ningun remedi, pasobra droga of alcohol ta kibra un hende su dominio propio. Pero Dios ta restaura e dominio propio bek.
E palabra di Dios ta mas fuerte cu cualkier therapia, pasobra e ta penetra den curason , den mente y espirito di e persona, y e persona ta lanta bek como ser humano, y na prome lugar ta hanja respet pa su mes, pa asina e por enfrenta bida bek.
Pero tin hende cu conscientemente no kier bay un Rehab, pasobra nan no kier bira responsabel y tuma bida na serio.
Nan sa masha bon cu nan tin yiu pa cria, cas pa atende, famia pa mantene, responsabilidad pa cumpli cune, y asina bo toca e parti ey, nan ta bay bek na e droga of alcohol, pa nan no ta capas pa haci, nada.
Wak bon con diabel por ganja hende pa nan rechasa locual ta digno y precioso, y tira nan bida afo den locual ta hiba na tur clase di destruccion.
Adiccion no ta cos di haci wega cune.
No sconde tras di adiccion.
No permanece como catibo di hende y di diabel.
No cumpra malesa pa bo curpa.
Bira responsabel.
Sinceramente, Pastor Marcel Balootje
