Durante e prome vragenuur di aña parlamentario 2026–2027, parlamentario John Hart di Fraccion di AVP lo trece e tema di delincuencia hubenil den sala di Parlamento. E debate di diaranson lo tuma lugar cu Minister di Enseñansa y Hubentud, Gerlien Croes. Hart kier haya claridad riba e papel concreto di e ministerio den prevencion di delincuencia hubenil y den guia di hobennan cu ta core riesgo.
Pa Hart, e problema no ta responsabilidad exclusivo di Ministerio di Husticia. Ministerio di Asuntonan Social y Ministerio di Enseñansa tambe mester participa activamente den un strategia integral. Delincuencia hubenil ta un problema social cu ta bay hopi mas leu cu solamente e tereno di husticia. Ora un hoben ta desvia di e caminda corecto, e causanan hopi biaha ta presente prome cu e hoben yega na contacto cu polis of husticia: abandono di scol, problema den famia, pobresa, falta di guia, desempleo y, sobre tur cos, falta di perspectiva pa futuro.
“Nos ta mira señalnan preocupante di hobennan, incluso bou di 15 aña, envolvi den atraco y otro delito serio. Nos mester sa kico ta wordo haci pa preveni cu un mucha drenta den criminalidad, pero tambe con gobierno ta actua ora esaki sosode,” Hart a enfatisa.
Segun e parlamentario, e combatimento di delincuencia hubenil ta exigi responsabilidad comparti. Husticia por garantisa mantencion di ley y orden; Enseñansa por ofrece hobennan structura y perspectiva; y Asuntonan Social por brinda sosten na hobennan y nan famianan ora nan situacion social y economico ta hunga un rol. Precisamente pasobra e problema ta toca diferente tereno di maneho publico, Hart ta pidi un debate integral cu Parlamento, enfoca tanto riba prevencion como riba e responsabilidad concreto di cada ministerio.
Durante e vragenuur, Hart lo pone e siguiente aspectonan riba mesa for di perspectiva di Ministerio di Enseñansa y Hubentud:
Abandono di scol como factor di riesgo
Abandono di scol ta un factor cu por contribui na delincuencia hubenil. Hart lo pidi dato tocante cuanto hoben actualmente ta bandona scol prematuramente na Aruba. Di e grupo aki, e kier sa cuanto hoben ta conoci y ta ricibi siguimento di enseñansa, instancianan di cuido pa hubentud of otro organisacion relevante.
Pa Hart, e cifranan aki ta necesario pa compronde e dimension di e problema y pa determina si hobennan cu ta sali for di sistema educativo ta haya e guia cu nan mester.
Enseñansa como factor di proteccion
E onderzoek De Schaduwkant van Aruba, haci pa encargo di Ministerio Publico, ta destaca enseñansa como un di e factornan di proteccion mas importante contra delincuencia hubenil. Hart lo pidi e minister pa splica kico gobierno ta haci concretamente pa identifica na tempo e hobennan cu ta core riesgo di bandona scol.
E lo puntra tambe cua medidanan ta existi pa yuda e hobennan aki keda den sistema educativo, ricibi guia adecua y haya oportunidad pa nan desaroyo personal y profesional. Segun Hart, prevencion mester cuminsa prome cu un hoben perde su conexion cu scol y cu e oportunidadnan cu enseñansa por ofrece.
Cuido despues di scol y actividadnan di tempo liber
E onderzoek ta señala tambe e importancia di cuido despues di scol, deporte y actividadnan di tempo liber cu un meta positivo. E programanan aki por fortalece e conexion social di hobennan y ofrece nan un perspectiva pa futuro.
Hart lo pidi informacion tocante cuanto hoben actualmente tin acceso na e tipo di programa aki na Aruba. Ademas, e kier sa unda e minister ta identifica e deficiencianan mas grandi, particularmente den barionan y comunidadnan vulnerabel unda hobennan por enfrenta mas riesgo di exclusion social y delincuencia.
“Ami a drenta politica pa eleva e nivel den parlamento. Cu e tipo di reunion asina aki, mi ta spera cu nos como parlamento por contribui na atende e temanan aki den cuadro di prevencion di delincuencia hubenil,” Hart a declara.
Hart ta spera cu e vragenuur lo habri caminda pa un debate mas amplio entre parlamento y e ministerionan concerni. Segun e parlamentario, Aruba mester un acercamento coordina cu ta interveni na tempo, sostene famianan y duna hobennan oportunidad real pa construi nan futuro.
