Dia 14 di november, Cas di Cultura lo ta anfitrion di e E Brasa Mediathon, un evento televisa di henter dia cu ta trece artistanan, bosnan cultural y comunidad hunto den sosten di e renobacion di nos Teatro Nacional di Aruba. E Mediathon ta forma parti di E Brasa, e campaña andando pa renoba Cas di Cultura y prepara e teatro pa futuro generacionnan di artista y publico. Pa medio di presentacionnan bibo, entrevista, material di archivo, y historia di añanan, e dia lo celebra e comunidad cultural y artistico di Aruba mientras ta destaca e importancia di conserva un espacio dedica na cultura y arte.
Pa generacionnan, e escenario di Cas di Cultura tabata un luga unda Aruba a baila, toca musica, conta storia, descubri talento nobo, y reuni como comunidad. Desde cu el a habri su portanan na 1958, e teater a proveé un cas pa musico, bailarin, actor, organisacionnan cultural, scolnan y artistanan bishitante. E necesidad pa conserva un espacio asina ta e curason di E Brasa. Renobacion di Cas di Cultura no ta simplemente pa restaura un edificio; ta trata di sigura cu Aruba ta sigui haya un luga dedica unda su storianan por wordo conta, su artistanan por desaroya nan ofishi, y generacionnan nobo por experencia e arte performativo.
Pa hopi Arubiano, nan conexion cu Cas di Cultura a cuminsa como mucha: atende un presentacion di scol, subi escenario pa prome biaha, wak un miembro di famia presenta, of sinta den e publico pa un produccion. E experiencianan individual aki colectivamente a haci Cas di Cultura parti di memoria cultural di Aruba.
Como e unico teatro proscenium den Caribe Hulandes, Cas di Cultura ta representa un pida importante di infrastructura cultural pa Aruba y e region mas amplio. Su escenario ta crea oportunidad pa obranan local wordo presenta den un ambiente teatral profesional mientras ta brinda tambe un espacio pa intercambio artistico entre Aruba, e region, y artistanan internacional.
Publico lo tin varios manera pa contribui na e campaña di E Brasa riba e dia, incluyendo donacion via telefon, transferencia bankario, digitalmente, y personalmente. Iniciativanan existente manera Adopta-un-Stoel, hunto cu otro oportunidadnan pa sostene e renobacion, tambe lo forma parti di e campaña.
Mas informacion tocante e artistanan participante, invitadonan, y programacion pa E Brasa Mediathon dia 14 di november lo wordo anuncia den e proximo simannan riba nos medianan social y www.casdicultura.aw. Un dia! Un meta! Esaki ta bo cas tambe!
