Diabierna ta trata caso penal contra Fernandes Pedra, sospecha di a mata dos hende cu Jeep y core bay.

Diabierna 2 October 2026, den Corte di Husticia ta bay trata e caso penal cu Ministerio Publico a cuminsa contra Chania Chante Fernandes Pedra (24). Na Augustus 2026, Hues a pospone e caso caminda Hues a rechaza e peticion di Fernandes Pedra pa e bay liber te dia di tratamento di e caso.

    SOLO DI PUEBLO por a compronde cu ningun abogado di Aruba no ta dispuesto pa defensa Fernandes Pedra. Esey tambe tabata motibo cu Hues a pospone e caso pa asina e sospechoso por haya asistencia di abogado for di Curacao.

ACUSACIONNAN

Na Augustus, Fiscal a presenta e acusacionnan contra Fernandes Pedra cu ta:

–          dia 4 Januari 2025, a dal mata e dama Josely Paulina Vasquez Gonzalez (65) y Carlos David Vialez Valerio (54) y sigui core bay.

–          Fiscal a sigui bisa cu Fernandes Pedra ta wordo acusa di tabata core e Jeep sin rijbewijs, core bou influencia, core cu velocidad halto y den un situacion emocional.

–          Fiscal tambe a bisa cu Fernandes Pedra ta wordo acusa di intento di mata di señora Williams y e homber Fernandes Rivas, kendenan tambe e momento ey tabata cruzando e caminda.

ABOGADO DI CURACAO

Hues a bisa cu tin mail di Fiscal cu ta bisa cu a purba haya asistencia di abogado di Aruba pa defende Fernandes Pedra. For di Orden di Abogado di Aruba, por a compronde cu no tin abogado cu lo kier ta dispuesto pero tin dos abogado for di Curacao cu ta dispuesto. Fiscal a bisa cu Departamento di Asuntonan Social a informa cu no tin informacion pa gastonan di estadia di e abogadonan di Curacao. Fiscal ta haya cu Hues lo mester tuma un decision riba esaki.

   Hues a mustra cu segun ley, e gastonan di honorario di abogado, estadia lo mester wordo cubri door di Gobierno di Aruba.

RAPORT DI PSYCOLOGO NO TA CLA

Hues a bisa cu el a haya un mail di psycologo Boekhoudt kende ta splica cu lo bay tuma mas tempo promer cu e raport di evaluacion di Fernandes Pedra ta cla. Esaki door di e estado emocional di Fernandes Pedra. E psycologo ta calcula cu e mester 3 siman mas.

FISCAL TA REACCIONA

Ta asina cu Fernandes Pedra den su peticionnan ta pidi entre otro pa e bay liber te ora di tratamento di e caso. Tambe e ta pidi pa scucha e dos peatonnan como testigo. Tambe e ta pidi pa reconstruccion di e accidente.

   Fiscal a bisa cu e no ta haya cu por laga Fernandes Pedra liber. El a mustra cu investigacion for di Hulanda ta mustra e comportacion di stuur sumamente peligroso di Fernandes Pedra cu a causa morto di dos hende. Fiscal a mustra cu pa e delito cu Fernandes Pedra a haci, tin un castigo di 8 aña di prison. Fiscal ta haya cu comunidad lo no gusta cu Fernandes Pedra lo wordo laga liber. El a remarca cu no tin situacionnan personal cu a wordo presenta cu ta mustra cu mester cambia di opinion. Tambe Fiscal a mustra cu e imagennan di video ta mustra bon cla kico a sosode y no ta haya cu mester haci reconstruccion di e accidente.

   Pa loke ta peticion pa scucha e testigonan, Hues a mustra cu psycologo ta mustra cu e testigonan lo core peliger si nan mester bolbe wordo scucha como testigo. Hues ta haya cu tin tur imagennan di video cu ta mustra tur cos. Hues ta haya cu ta suficiente pa a scucha e testigonan na Hues Comisario.

SOSPECHOSO TA KEDA DEN PRISON

   Hues ta haya cu tin motibonan di peso, teniendo na cuenta cu e raportnan nobo cu tin awor. Na opinion di Hues, teniendo cuenta cu pa e delito tin castigo di 8 aña di prison y a shock comunidad, no por laga Fernandes Pedra liber awor. 

LO PASA VIDEO DI ACCIDENTE DEN CORTE

Hues a bisa cu e idea ta pa dia 2 October 2026, durante tratamento di e caso, lo pasa video di loke a pasa. Hues a sigui bisa cu si famianan di victimanan ta haya cu esaki ta pisa, nan lo por sali pafor di sala di Corte un rato.

   Lo informa lectornan tur loke a sosode dia 2 October 2026 den sala di Corte di Husticia di Aruba.