Presidente di Partido Nashonal Dudley Lucia na Aruba pa Congreso 2026 di AVP

Presidente di Partido Nashonal di Pueblo (PNP) di Corsou, Dudley Lucia, a yega Aruba pa participa na Congreso 2026 di Partido AVP, cu lo tuma luga diadomingo 4 di october na Aruba Marriott Resort Grand Ballroom.

Parlamentario y Presidente di Directiva di AVP Clifford Heyliger a ricibi Lucia na su yegada na Aruba. Su bishita ta sigui e yegada di lider politico di PNP, Ruthmilda “Mimi” Larmonie-Cecilia, kende tambe ta na Aruba pa presencia e Congreso.

E delegacion di PNP ta presente den un momento di relevo di liderazgo pa AVP, mientras Partido Nashonal na Corsou tambe ta preparando pa un cambio den su liderazgo.

Clifford Heyliger: sosten di un partido ruman

Durante e bonbini, Clifford Heyliger a expresa satisfaccion cu presencia di Presidente di Partido Nashonal na Aruba y a describi PNP como partido ruman di AVP na Corsou.

Heyliger a destaca cu Congreso 2026 ta un momento sumamente importante pa AVP, specialmente pa motibo di e cambio den liderazgo. El a señala cu partido ta pasando pa un generacion mas hoben y cu presencia di PNP ta representa sosten durante e proceso aki.

Presidente di Directiva di AVP a expresa tambe aprecio pa e experiencia cu Dudley Lucia ta trece cu ne y pa e intercambio di ideanan cu lo tin durante su estadia na Aruba.

Dudley Lucia: ambos partido ta den un cambio di liderazgo

Dudley Lucia a señala cu e momento cu AVP ta pasando aden tin similitud cu e proceso den Partido Nashonal na Corsou. Mientras AVP ta prepara pa su cambio di liderazgo durante Congreso 2026, Lucia a indica cu Partido Nashonal tambe ta preparando pa un cambio den su liderazgo prome cu november.

Segun Lucia, mas leu di e amistad entre ambos partido, AVP y PNP ta comparti un base ideologico cristian-democrata. El a destaca cu e lasonan entre ambos organisacion politico ta bay hopi generacion atras.

Lucia a referi na e relacion historico entre e famia Eman y Dr. Moises da Costa Gomez como parti di e historia comparti entre ambos partido. El a señala cu e lasonan entre PNP y AVP, mescos cu esnan cu UPB di Boneiro, ta existi for di hopi tempo.

Un relacion cu a sigui durante generacionnan

Lucia a recorda cu e relacion entre e partidonan no a keda limita na afinidad ideologico. Segun dje, den pasado partidonan a traha hunto den coalicionnan y Aruba tambe a aporta ministronan cu a ocupa funcionnan importante den e Antias Hulandes.

Pa Lucia, e relacion fraternal y e base ideologico comparti ta haci cu PNP no por falta durante un momento asina importante pa AVP.

Pa e motibo ey, tanto Lucia como Presidente di Partido Nashonal como Ruthmilda Larmonie-Cecilia como lider politico di PNP ta presente na Aruba pa acompaña AVP durante e cambio di liderazgo.

Intercambio entre un generacion y otro

Lucia a destaca tambe e importancia di intercambio entre partidonan. El a reconoce cu cada partido tin su propio stilo y forma di participacion politico, pero cu nan por siña uno di otro y complementa otro.

Den e contexto ey, Lucia a menciona cu PNP a sigui cu entusiasmo e forma cu e parti hoben di AVP a participa den e ultimo campaña. Segun dje, esaki ta un ehempel di un area caminda partidonan por intercambia experiencia y siña uno di otro.

E cambio di liderazgo, segun Lucia, ta un momento transcendental pasobra ta marca e paso di un generacion pa un generacion mas hoben.

PNP presente pa e relevo di liderazgo

Lucia a desea pueblo di Aruba bon exito cu e liderazgo nobo y a señala cu AVP tin un historia di lidernan cu a desempeña un papel importante den historia politico di Aruba.

Na final di e recibimento, Clifford Heyliger a gradici PNP pa e sosten y a expresa e deseo pa e lasonan historico entre ambos partido sigui reforsa durante e dianan di Congreso y den futuro.

Congreso 2026 di Partido AVP lo tuma luga diadomingo 4 di october na Aruba Marriott Resort Grand Ballroom, cuminsando pa 9:00 di mainta.

Pa mas informacion, bishita www.avp.aw.