Accion di Bario a yega e siman aki na Juwana Morto Complex na San Nicolas, caminda diferente instancia y organisacion a uni forsa pa acerca nan servicio directamente na habitantenan, scucha nan necesidadnan y atende diferente situacion den bario.
Prome Minister Mike Eman, Minister Rene Herdé y Minister Wendrick Cicilia a haci e recorido acompaña pa representantenan di Serlimar, City Inspector, DVG, KPA, GKMB, DOW, Departamento di Asunto Social, Luna Foundation y FCCA. E composicion multidisciplinario a permiti cu diferente asunto cu residentenan treci dilanti por yega directamente cerca e instancia cu ta traha den e area concerni.
Un di e señalnan positivo cu a sali durante e recorrido ta e progreso den limpiesa. Michael Raymond, Operations Manager na Serlimar, a indica cu compara cu aña anterior, Juwana Morto Complex ta considerablemente mas limpi y cu e cantidad di peticion cu Serlimar ta ricibi relaciona cu sushi den e area a baha.
Raymond a resalta tambe e beneficio di tene diferente stakeholder presente na mes momento. Segun e, esaki ta haci posibel pa cada departamento atende e necesidadnan cu ta cay bou di su responsabilidad y, caminda ta posibel, busca solucion hunto cu e residente.
Na mes momento, Bureau City Inspector tabata activamente envolvi den e accion di limpiesa. Robert Ras a indica cu durante e prome dia ya a yena dos baki cu sushi, mientras varios pickup a ser uza pa retira mas desperdicio. E trabou lo continua e siguiente dia pa atende e restonan cu ainda a keda atras.
Ras a destaca cu reaccion di habitantenan ta positivo. Ademas di mira accion concreto den nan bario, residentenan ta haya oportunidad pa comparti nan preocupacionnan y peticionnan directamente cu Prome Minister y e diferente instancianan presente.
Cuido di bario tambe ta prevencion
Dionicio Richardson di GKMB a aporta un otro dimension importante na e bishita: prevencion y conscientisacion. Nan trabou ta inclui bishita cas pa cas pa informa y educa habitantenan con nan por evita criadero di sangura rond di nan propiedad.
E enfoke ta specialmente riba elimina recipiente y otro obheto cu por acumula awa, y mantene patio y rond di cas bon cuida. E representante di GKMB a expresa satisfaccion cu e cooperacion cu nan ta haya di habitantenan, resaltando cu prevencion ta algo cu comunidad y instancia concerni mester haci hunto.
Zoey Konijn di Luna Foundation a enfoca riba otro aspecto di un comunidad bon cuida: bienestar di animal y responsabilidad di doñonan di mascota. A indica cu Juwana Morto Complex ta ehemplar den cuido di nan mascota, mayoria ta den cura y bon manteni.
E fundacion a haci un apelacion na demas habitantenan pa cuida nan mascota, tene nan bou control y no laga cachonan cana liber riba caya, caminda nan por causa molester of crea situacion peligroso pa otro hende.
E mensahe ta simpel: loke un hende mester pa ta bon cuida, un mascota tambe tin su necesidadnan. Luna Foundation a recorda habitantenan cu nan ta disponibel pa brinda orientacion y ayudo caminda ta posibel.
Scuchando habitantenan na porta di nan cas
Pa FCCA, Accion di Bario ta brinda oportunidad pa acerca directamente e habitantenan di su propiedadnan. Maroushka Rafini di FCCA a splica cu durante e bishitanan, nan ta bati na porta, scucha loke habitantenan tin di bisa y registra eventual sugerencia of keho relaciona cu FCCA pa por sigui traha riba nan internamente.
Segun Rafini, residentenan ta probecha e presencia di FCCA den bario pa trece nan puntonan dilanti. Na Juwana Morto, entre otro, a papia tocante cambio di e “percolanan”, un asunto cu segun Rafini ya ta den planificacion como parti di un proyecto pa 2027, cu e speransa cu esaki por concretisa mas pronto posibel.
E recorido na Juwana Morto Complex a mustra asina e balor di reuni diferente expertise den un solo bario. Mientras Serlimar y City Inspector ta contribui na limpiesa, GKMB ta enfoca riba prevencion, Luna Foundation riba bienestar di mascota y FCCA riba contacto directo cu habitantenan, e otro stakeholdernan presente ta completa e enfoke multidisciplinario di Accion di Bario.
Mas cu un bishita, e iniciativa ta crea un oportunidad pa instancia y comunidad mira, scucha y actua hunto. E progreso cu ya por mira den limpiesa y e reaccion positivo di residentenan ta mustra cu ora cada stakeholder aporta for di su propio responsabilidad, e resultado por ser sinti directamente den bario.
Accion di Bario ta asina tambe un momento pa reconoce loke ta bayendo bon, tende loke ainda mester atencion y sigui traha hunto pa un comunidad mas limpi, cuida y conecta.
