Djawebs último e Sentro di Operashonnan Marítimo (MOC) di Wardakosta a risibí un
yamada di un persona ku a mira un señal di ‘flare‘ (vürwèrk kòrá) riba laman den
besindario di Sta. Cruz. Abase di e yamada akí MOC a dirigí e avion di Wardakosta
pa e lokalidat di e ‘flare‘ pa por evaluá e situashon.
Na yegada na e area e tripulashon di e avion a mira un boto ku un hòmber abordo ta
zuai pa yudansa. Despues ku e boto aki a keda detektá, MOC a manda un Metal
Shark na e sitio pa duna asistensia. E Metal Shark a tou e boto ku e hòmber lokal na
bordo hiba seif na direkshon di e bahia di Sta. Cruz.
Den e situashon di emergensia aki e ‘flare’ na bordo a resultá esensial. E hòmber a
sa di usa esaki pa hala atenshon di personanan na tera pa laga sa ku e tabata den
un situashon di emergensia. Den un situashon di emergensia un ‘flare’ por ta un dje
ekiponan importante pa hala atenshon di hende òf otro botonan den besindario ora
ku otro medionan di komunikashon no ta disponibel na e momentu ei na bordo.
Wardakosta ta konsehá tur doño di boto pa mantené nan boto regularmente. Sòru pa
bo tin sufisiente ekipo di seguridat i reskate na bordo manera: salbabida, ‘flare’,
flashlight, kit di promé asistensia, sufisiente awa, aparato di paga kandela, radio VHF
i un telefon selular kargá. Evita ku bo boto ta daña na kaminda i kubo tin un situashon
peligroso riba laman ku bo boto i bo pasaheronan. Den kaso ku bo mester di
yudansa, bo por tuma kontakto ku Wardakosta riba kanal VHF 16, yama e number di
emergensia 913, òf manda un mensahe via Whatsapp na 005999 510 0913.
Wardakosta ta deseá bo un biahe plasentero i sigur.
