Parlamentario di AVP, ing. Carlos Bermudez, ta propone introduccion di un sistema automatisa pa maneha e turno di taxistanan na aeropuerto, cu e meta di trece mas orden, transparencia y trankilidad.
Durante un encuentro reciente cu CEO di Aruba Airport Authority, Sr. Jonny Andersen, Bermudez a presenta su preocupacionnan y algun propuesta pa mehora tanto e sistema di parkeo como e condicionnan den e area di espera.
Segun Bermudez, e espacio di parkeo ta suficiente, pero e manera cu ta registra y maneha e turno di taxistanan mester wordo modernisa.
Actualmente, tin momento cu ta depende di e bon boluntad di un persona pa mantene un lista di taxistanan cu a yega y indica ken ta na beurt.
โDen e era digital cu nos ta biba, no ta hustificabel cu un servicio asina importante ta sigui depende di un lista manteni manualmente. Nos por uza tecnologia pa trece claridad y evita discusion innecesario,โ Bermudez a expresa.
Pa duna su propuesta un base concreto, e parlamentario a tuma e iniciativa di solicita un cotizacion na un compania pa conoce e costo y e funcionamento di un sistema automatisa di maneho di turno, conoci como un taxi queue management system.
E sistema proponi lo uza camaranan cu ta reconoce e number di plachi di cada taxi, habri e gate y registra automaticamente su luga den e fila. Si un taxista mester sali pa un emergencia, e por uza un salida separa y e sistema lo elimina su registro automaticamente for di e fila.
Bermudez a indica cu den pasado a surgi discusion y pelea pa motibo di falta di un registro cla di e secuencia di yegada. Un sistema automatisa por contribui na preveni e situacionnan aki y duna cada taxista mas siguridad tocante su turno.
โNa final, nos taxistanan mester por concentra riba duna un bon servicio na nos bishitantenan. Un sistema cla y confiabel ta contribui na trankilidad entre nan y na calidad di e servicio,โ e parlamentario a seรฑala.
Mehoracion di e area di espera
Durante e encuentro, Bermudez a trece dilanti tambe e condicion di e edificio den e area caminda taxistanan ta warda, cu el a describi como deplorabel.
Segun e parlamentario, Andersen a sigura cu lo atende na mantencion di limpieza di e lugar.
Como un siguiente fase, despues di e automatizacion di e sistema, Bermudez a propone evalua e posibilidad di pone un food truck cerca di e area di espera. Esaki lo duna taxistanan acceso mas facil na cuminda y bebida durante e tempo cu nan ta warda pa duna servicio.
Alabes, e ta propone cu e entrada genera pa huur di e food truck por wordo destina pa reduci e tarifa cu taxistanan ta paga pa duna servicio na aeropuerto.
Segun Bermudez, diferente taxista cu el a papia cu ne a indica cu nan ta evita bay aeropuerto precisamente pa motibo di e cobro aki.
Pa e parlamentario, ta importante evalua posibilidadnan pa reduci, y eventualmente elimina, e tarifa, cu e meta di stimula mas taxista pa duna servicio na aeropuerto.
Bermudez ta considera cu e propuestanan aki por contribui na un sistema mas eficiente y un ambiente di trabou mas adecua pa taxistanan, cu beneficio tambe pa e bishitantenan cu ta haci uzo di nan servicio.
