Minister di Educacion, sra. mr. Gerlien Croes, a presencia e ceremonia di graduacion di e programa di estudio Organization, Governance and Management (OGM) y Master’s in Governance & Leadership (MGL) na Universidad di Aruba (UA), caminda e la entrega e diplomanan y felicita e graduadonan pa nan logro academico y nan compromiso cu e futuro di nos pais.
E programa di Organization, Governance and Management ta un estudio amplio y generalista cu ta promove un acercamento multidisciplinario y di diferente perspectiva. E graduadonan di OGM ta prepara pa ehecuta rolnan profesional clave den nos comunidad, tal como consehero di politica (policy advisor), consehero di organisacion, gerente, of investigado. Ora di traha den un posicion den sector publico of priva, ta spera cu e graduadonan ta duna conseho enfoca riba temanan organisatorio y social, diseña y crea solucion pa problema existente y emergente, y crea posibilidadnan nobo anticipando un sociedad den cambio constante.
E programa OGM ta defini e areanan di estudio den diferente manera, incluyendo e diseño di un entidad organisatorio, su structura, vision, mision y organonan di decision. Tambe nan ta enfoca ariba e procesonan y interaccionnan cu cual e organisacion ta involucra y consulta su stakeholders y ta rindi cuenta di su logronan. Maneho ta caracterisa con ta tuma decision y con ta realisa esakinan den un organisacion, sea un gobierno of un compania priva. Por lo tanto, maneho ta determina con un organisacion ta wordo dirigi, administra of controla.
E ceremonia di graduacion di e aña aki ta marca un momento hopi special pa e departamento. Durante e ceremonia, a celebra e graduacion di e di 100 graduado di e programa di Bachelor den Organization, Governance and Management (OGM). Ademas, cu hopi orguyo minister a otorga e prome titulonan na e graduadonan di e programa di Master den Governance and Leadership (MGL).
Durante e ceremonia, Minister Gerlien Croes a resalta e importancia di tin profesionalnan capacita den e disiplinanan aki pa fortalece e maneho strategico den tanto sector publico como priva na Aruba. E mandatario a desea e graduadonan hopi exito den nan carera profesional y den nan aporte na e desaroyo sostenibel di nos pais.
