Aruba Conservation Foundation (ACF) como un organisacion independiente di maneho di conservacion, ta invita famianan pa un anochi special di pelicula na Centro di Bishitante di Parke Nacional Arikok. Dia 14 di october 2026, for di 6’or y mei te cu 9’or di anochi, ACF lo presenta e pelicula anima “The Wild Robot”, un historia pa grandi y chikito cu ta pone naturalesa central.
“The Wild Robot” ta conta e historia di Roz, un robot cu ta lanta na un isla bandona sin memoria di su origen. Den su ambiente nobo, Roz mester siña con pa sobrevivi y adapta den e naturalesa rond di dje. Durante su aventura, e ta cera amistad inespera y poco poco e ta descubri su proposito, e importancia di empatia, colaboracion, y e conexion cu naturalesa.
E iniciativa aki ta parti di ACF su departamento di “Learning & Outreach”, cu e meta pa inspira y involucra e comunidad pa balora y proteha Aruba su herencia natural. Den su rol di educador ACF ta busca pa crea experiencianan cu ta inspira, conecta nos comunidad cu naturalesa, y stimula hende pa tuma accion pa su proteccion.
Durante e anochi, ACF lo duna un presentacion cortico tocante Aruba su especienan endemico y e rol importante cu nan ta hunga den nos sistema ecologico. E presentacion lo wordo presenta door di ACF su departamento di Learning & Outreach, creando un momento educativo y interactivo unda grandi y chikito por siña mas tocante Aruba su naturalesa unico.
ACF ta dedica e anochi aki na famianan, cu un enfoke special riba mucha di 6 aña bay ariba. ACF ta kere cu creando oportunidad pa muchanan conecta cu naturalesa for di un edad jong, lo por cultiva un sentido di aprecio, respet y responsabilidad pa Aruba su naturalesa. Inspirando e prome generacion cu amor y respet pa naturalesa, lo aporta na e formacion di muchanan pa ta Aruba su futuro guardiannan di naturalesa. Bou di strea y rondona pa naturalesa, famianan lo por disfruta hunto di un experiencia memorabel cu ta combina diversion cu siñamento.
Pa disfruta di e anochi comodamente, ACF ta invita participantenan pa trece nan propio (klap)stoel. Cuminda y bebida lo ta disponible pa cumpra durante henter e anochi.
Capacidad ta limita y pesey ACF ta invita pa registra famia mas pronto posibel. Por registra usando e proximo link Movie Night Registration Form – Fill out form. Pa mas informacion por tuma contacto cu Aruba Conservation Foundation na info@acf.aw of por bishita paginan social Facebook of Instagram.
