Cooperacion entre Aruba, Boneiro y Corsou por contribui na un solucion sostenibel y economicamente viable pa e islanan ABC
Den cuadro di su bishita oficial na Boneiro, Prome Minister Mike Eman a bishita SELIBON, caminda e a reuni cu director interino Edsel Winklaar pa dialoga riba e posibilidad di establece un cooperacion regional pa maneho y procesamento di desperdicio entre Aruba, Boneiro y Corsou.
E bishita ta forma parti di e esfuersonan di Gobierno di Aruba pa explora un modelo di cooperacion cu por brinda solucionnan sostenibel pa e reto di desperdicio cu e tres islanan ta enfrenta.
Durante e encuentro, Prome Minister Eman a presenta e posibilidad di desaroya un centro regional di maneho di desperdicio na Aruba, caminda por concentra actividadnan di separacion, reciclahe y exportacion di diferente tipo di material.
Segun Eman, e idea aki a haya impulso despues di contacto cu Vereniging van Nederlandse Gemeenten (VNG) na mei 2025, ora a identifica e retonan cu Boneiro ta enfrenta riba tereno di maneho di desperdicio.
Despues di diferente deliberacion, Aruba a reacciona positivamente riba e peticion pa explora si Boneiro y Corsou lo ta dispuesto pa participa den un iniciativa regional, hunto cu e partnernan Hulandes.
Un di e posibilidadnan cu ta considera ta pa identifica un espacio den e area industrial di e ex-refineria na Aruba, caminda eventualmente por establece un centro di “waste management” cu capacidad pa atende e necesidadnan di e tres isla.
Prome Minister Eman a splica cu e principal bentaha di un cooperacion di e tipo aki ta e posibilidad di combina e volumen di desperdicio di Aruba, Boneiro y Corsou.
Actualmente, cada isla individualmente no semper ta genera suficiente cantidad di cierto material pa haci su procesamiento economicamente posibel. Sin embargo, ora combina e volumen di e tres isla, por surgi oportunidad pa desaroya actividad di reciclahe y procesamento cu ta mas atractivo for di un punto di bista economico.
“Reto cu Aruba tin, Corsou tin y Boneiro tin, ta cu cierto material nos no tin na volumen grandi. Pero si nos trece nan hunto, posibelmente e volumenan ta suficiente grandi pa haci cierto parti di e ciclo economico posibel,” Prome Minister Eman a indica.
Durante su recorido na SELIBON, Prome Minister Eman a observa cu Boneiro y Aruba ta implementando diferente iniciativa cu ta comparti e mesun meta di mantene nan isla limpi y saludabel.
Eman a menciona e programa Cuida Aruba, cu ta brinda comunidad e facilidad pa entrega desperdicio na diferente punto di coleccion, y a compara e iniciativa cu Kuida Boneiru, cu ta implementa un sistema similar.
Segun Prome Minister Eman, e similaridad entre e iniciativanan ta mustra cu e islanan ta enfrenta reto comun y cu tin oportunidad pa siña uno di otro.
Otro aspecto importante di e propuesta regional ta transporte maritimo. Durante e intercambio a dialoga riba e posibilidad di uza barco dedica pa transporte di container cu material entre e islanan ABC.
Un sistema di transporte regional eventualmente por contribui na un conexion logistico mas eficiente entre Aruba, Boneiro y Corsou, mientras cu e por crea oportunidad pa otro actividad economico.
Prome Minister Eman a enfatisa cu e meta ta pa e islanan por maneha nan desperdicio den un forma mas profesional, sostenibel y cu potencial economico.
E dialogo cu SELIBON ta forma parti di un proceso exploratorio cu Gobierno di Aruba ta impulsando, y cu lo continua cu e partnernan na Corsou y Hulanda.
Pa Gobierno di Aruba, e iniciativa ta representa un oportunidad pa transforma un reto comparti den un posibilidad di cooperacion regional, cu por contribui na proteccion di medio ambiente, desaroyo economico y bienestar di e comunidadnan di nos islanan.
