Parlamentario di AVP, Clifford Heyliger, ta destaca e importancia di e proyecto di ley pa Fondo di Inversion y Desaroyo, cu ta wordo trata e siman aki den Parlamento di Aruba. Durante su intervencion diahuebs, Heyliger a enfatisa con inversion den vivienda, infrastructura y bienestar mester traduci den mehoracion concreto den bida diario di nos ciudadanonan.
Pa Heyliger, e importancia di e Algemene Investerings- en Ontwikkelingsfonds no ta na duda. E debate mester duna claridad tocante e prioridadnan di inversion y con e fondo lo contribui na atende necesidadnan cu pueblo ta enfrenta.
Heyliger a critica e manera cu oposicion ta uza e palabra “crisis” na cada oportunidad, mientras, segun e parlamentario, no ta reconoce e consecuencianan di decisionnan tuma durante nan propio periodo di gobernacion.
Den e contexto aki, el a señala e aumentonan di BBO di 3% pa 6% y despues pa 7%, y e introduccion di BBO na frontera. Segun Heyliger, e medidanan aki a contribui na e presion financiero cu famianan ta sinti awe.
E parlamentario ta considera cu un debate serio tocante costo di bida mester inclui e decisionnan cu a trece Aruba na su situacion actual, hunto cu e pasonan cu ta necesario pa atende e necesidadnan di comunidad.
Riba e tema di vivienda, Heyliger a cuestiona cuanto cas social a wordo construi durante e shete aña y mey di e anterior gobernacion, y cuanto a wordo inverti den infrastructura y edificionan.
El a trece dilanti tambe e situacion di infrastructura di De Vuist, na San Nicolas. Pa Heyliger, e necesidadnan di e area aki merece atencion y no por wordo laga atras pa motibo di su ubicacion.
E parlamentario ta considera cu Fondo di Inversion y Desaroyo mester contribui na atende e necesidadnan di e diferente distritonan, cu prioridadnan cla y inversion cu ta responde na e realidad di e hendenan cu ta biba ey.
Heyliger a señala cu e apelacionnan di oposicion den sala di parlamento pa “good governance” mester wordo evalua tambe den luz di nan propio decisionnan den gobernacion. El a cuestiona e consideracion duna na e posibel impacto di e proyecto Eagle LNG, e decision pa stop e practica di hedging na WEB y e creacion di Aruba Renewable Energy N.V. (ARE N.V.).
Pa e parlamentario, e debate tocante e decisionnan aki mester inclui nan implicacionnan pa e prijs di awa y coriente y, consecuentemente, pa e cartera di pueblo.
Durante su intervencion, Heyliger a dirigi preguntanan concreto na gobierno actual tocante infrastructura cu ta afecta bienestar diario. El a destaca cu tin parada di bus sin afdak, sin luga pa sinta y sin sombra, y a puntra con ta categorisa e necesidad aki y si tin un plan pa atende nan.
Tambe a pidi claridad tocante San Nicolas. Aunke tin diferente plan pa e ciudad, Heyliger kier sa ki ora por spera un plan concreto di inversion pa su desaroyo.
Pa Heyliger, e tratamento di Fondo di Inversion y Desaroyo ta un oportunidad pa conecta e planificacion di gobierno cu e necesidadnan real di comunidad. Vivienda accesibel, infrastructura adecua y facilidadnan basico mester ocupa un lugar central den e decisionnan, pa e inversionnan resulta den mehoracion cu pueblo por sinti.
