MEP: Gobierno ta pidi parlamento pa aproba agenda di inversion sin financiamento completo

Fondo General di Inversion y Desaroyo (AIOF) ta un check blanco!

Fraccion di MEP ta expresa su preocupacion cu Gobierno ta pidi Parlamento pa aproba un agenda di inversion di Afl. 59,5 miyon, mientras cu actualmente tin solamente Afl. 33,3 miyon disponibel. Esaki ta crea un diferencia di Afl. 26,2 miyon, cu ainda no tin cobertura financiero garantisa.

E diferencia lo mester wordo cubri cu surplusnan den futuro cu Parlamento ainda no a aproba. Tampoco ta conoci cua suma ta destina pa cada proyecto ni ken lo determina cua proyectonan lo wordo ehecuta. Pa MEP, Parlamento no por aproba un suma di tal magnitud sin cobertura concreto y sin sa cua proyectonan tin prioridad.

E falta di claridad ta aumenta door di e cambionan den e cifranan. Den dos luna, e fondo a subi di Afl. 43,1 miyon pa Afl. 59,5 miyon, mientras cu e financiamiento disponibel a baha. Na augustus, Gobierno ainda tabata papia di un fondo di Afl. 65 miyon. Ademas, e saldo inicial ta preliminar y no por confia riba dje, pasobra e Cuenta Anual 2025 di pais Aruba no a wordo aproba. Raad van Advies ya caba a señala e inconsistencia den e informacion financiero.

Ademas, Gobierno ta agrega aproximadamente Afl. 34 miyon na proyectonan nobo, mientras cu mantencion di caminda y boto di polis ta wordo posponi. MEP ta cuestiona con e seleccion a wordo haci, si e proyectonan a wordo evalua door di e Comision di Inversion y Evaluacion, y unda e base financiero, economico y social ta pa cada proyecto.

MEP ta pidi Gobierno pa, prome cu Parlamento vota, presenta un bista completo, definitivo y transparente di cua proyectonan lo wordo financia, cuanto cada uno ta costa, di unda e placa ta bin y cua tin prioridad.

“Sin fondo garantisa y sin claridad tocante e seleccion di proyectonan, un Parlamento responsabel no por duna un aprobación cu ta mas cu un check blanco”, lider di fraccion Evelyn Wever-Croes a duna di conoce.