Mundo ta buscando tur clase di experto, tur caminda kier tin hende prepara cu sa bon kico nan ta bay haci , pero locual nos ta lubida, ta pa un hende bira experto e tin cu traha prome, pasobra un cos ta papel, y un otro cos ta practica, y ta door di pratica hende ta hanja conocemento, y cu amor pa locual bo ta haci bo ta hanja experiencia.
Den Isaias 9: 6 ta para scirbi tocante e nacemento di Hesus, pa tur hende por sa ta ken lo nace, pasobra mas cu siete shen anja prome cu Hesus a nace profeta Isaias a profetisa di dj’E bisando:
Pasobra un yiu a nace pa nos, un yiu homber ta duna na nos, y e gobernacion lo ta riba su schouder.
Su nomber lo ta:
Consehero Maraviyoso, Dios Poderoso. Tata Eterno, Principe di pas.
E mesun Isaias ta bolbe recorda nos un biaha mas cual ta e linahe di Hesus bisando den Isaias 11:1-2:
Anto un spreit lo sali for di e troncon di Isai, y un rama for di su raisnan lo carga fruta.
E Spirito di Dios lo keda riba dje,E spirito di sabiduria, y comprendemento,E spirito di conseho y poder, E spirito di conocemento y temor di Senjor.
Y ora Hesus a bini na mundo E mes a bisa lo siguiente:
E ora ey Hesus a bolbe papia cu nan bisando: Ami ta e lus di mundo, esun cu sigi Mi, lo no cana den scuridad, ma e lo tin lus di bida.( Juan 8:12).
Y Hesus ta bolbe confirma na nos un biaha mas ken E ta bisando;Ami ta e caminda, y e berdad, y e bida,ni un hende no ta bin serca e Tata sino pa medio di Mi ( Juan 14:16).
Pero tambe den Mateo 11:28 , Hesus ta ofrece algo na nos , cu ningun dokter, ni psycholoog, ningun psychiater, ningun remedi traha pa man di hende no por duna nos. E ta bisa; Bin serca Mi tur cu ta cansa y carga y lo Mi duna boso sosiego.
No tin nada den nos bida cu si nos bati porta serca Hesus cu e no tin contesta pa nos,ningun situacion ta dificil pa E, y nada no ta imposibel pa E.
Pasobra pa medio di dj’E tur cos a wordo crea, tanto den cielo como riba tera,visibel y invisibel,sea trono of dominio,of gobernante of autoridad, tur cos a wordo crea pa medio di dj’E of pa E,. E ta e prome den tur cos, y den dj’E tur cos ta consisti. ( Colosensenan 1:16-17).
Pesey ta para scirbi den Filipensenan 2:9-11: Pesey Dios a halse te na halturanan y a dun’E e nomber cu ta riba tur nomber.
Cu pa e nomber di Hesus tur rudia mester dobla, di esnan cu ta den cielo,y riba tera y bao di tera,y cu tur lenga mester confesa cu Hesus Cristo ta Senjor pa e gloria di Dios Tata.
Den Cristo Hesus nos tin Salbacion,sanacion, liberacion, misericordia, pordon, gracia, amor . Pas comprendemento, y nos tin bida eterna.
Den Juan 13:13 Hesus ta bisa algo hopi bunita: Boso ta yama Mi , Maestro y Senjor y boso tin rason, pasobra esey Mi ta.
Den tur humildad nos mester bini den presencia di Senjor pa nos ricibi pronto auxilio y ayuda na tempo, nos mester reconoce cu nos mester di Cristo Hesus, awe , mayan y pa semper,pasobra solamente riba Cristo Hesus nos por depende.
E ta nos fuente di alegria y nos Senjor.
Sinceramente , Pastor Marcel Balootje
