MEP ta apoya inversionnan strategico pa desaroyo di Aruba. Pero, segun lider di fraccion Evelyn Wever-Croes, Gobierno no por papia di inversion pa futuro sin atende e crisisnan cu famianan y hobenan ta enfrenta awe.
“Aruba mester inverti, pero cu inteligencia, riba un base legal y structural. Prome cu aproba Afl. 59,5 miyon pa futuro, nos mester sa: kiko Gobierno ta haci pa e Aruba di awe?”
Durante e debate na Parlamento, diferente crisis a wordo menciona, entre otro e costo di bida, e situacion na hospital, turismo, husticia, e sector social, salud mental y e problemanan rond di fiansa di estudio y descuento di berdad.
Segun Wever-Croes, Gobierno no ta duna e crisisnan aki e atencion necesario, apesar cu tin placa disponibel pa inversion. “Tin famia cu no por cubri nan gastonan mensual. Con e fondo aki ta yuda nan? Niun florin di e Afl. 59,5 miyon ta destina especificamente pa atende e crisisnan cu nos ta enfrenta awor.”
MEP ta cuestiona tambe e financiamiento di e agenda di inversion. Di e Afl. 59,5 miyon cu gobierno kier gasta, solamente Afl. 33,3 miyon ta disponibel actualmente. E diferencia di Afl. 26,2 miyon depende di aportenan y surplusnan cu Parlamento ainda no a aproba, pues ta promesanan cu ainda no ta cumpli.
Ademas, no tin suma reserva pa proyecto especifico, y e conseho di e Comision di Inversion y Evaluacion no a wordo comparti cu Parlamento.
Wever-Croes a pidi e presidente di Parlamento pa suspende e reunion te ora e conseho di e comision ta disponibel, manera ley ta stipula, pero presidente a nenga esey.
“Nos no ta contra inversion. Pero un inversion cu no por splica cua problema e ta resolviendo, no ta un inversion responsabel. Sin claridad, sin cobertura financiero y sin evaluacion, Gobierno ta pidi Parlamento pa firma un check blanco. MEP no ta participa na gobernacion iresponsabel pasobra nos a mira caba den pasado cuanto daño esey ta causa na nos cuidadanonan”, segun Evelyn Wever-Croes.
