Prome Minister di Aruba, mr. Mike Eman, a participa diasabra na e celebracionnan oficial di Dia di Corsou, conmemorando 16 aña desde cu Corsou a obtene su status di pais autonomo den Reino Hulandes. Durante su bishita, Prome Minister Eman a destaca e importancia di autonomia y e necesidad pa progreso economico traduci den bienestar pa tur ciudadano.
E celebracionnan a cuminsa cu un reunion solemne den Parlamento di Corsou, presidi pa Presidente di Parlamento, Fergino Brownbill. Prome Minister Eman tabata presente hunto cu Prome Minister di Corsou, Gilmar “Pik” Pisas, Prome Minister di Jamaica, Andrew Holness, y Vice-president di Surinam, Gregory Rusland. Durante e sesion solemne, atencion a bay na e importancia historico di 10 di october 2010, fecha cu Corsou a obtene su status di pais autonomo. E conmemoracion a brinda oportunidad pa reflexiona riba e trayectoria di Corsou durante e ultimo tempo y e futuro di e pais. Mester destaca cu Prome Minister Eman tabata presente na Corsou 16 aña pasa durante e ceremonia historico na Brionplein e tempo ey como Prome Minister di Aruba bou Gabinete Mike Eman I (2009-2013)
Prome Minister Eman destaca importancia di bienestar pa tur ciudadano
Prome Minister Mike Eman a expresa su satisfaccion di por compaña e pueblo di Corsou durante e celebracion di su autonomia. El a reflexiona riba e lucha historico di Corsou pa autonomia, cu a conta cu e contribucion di Dr. Moises Frumencio da Costa Gomez, y cu a conoce momentonan importante cu e introduccion di Statuut di Reino na 1954 y e cambio constitucional di 10 di october 2010. Segun Prome Minister Eman, autonomia a habri caminda pa Corsou desaroya su mes como pais. El a destaca cu den diferente indicador por observa progreso importante, pero cu, mescos cu na Aruba, ainda tin e desafio pa traduci e progreso aki den bienestar pa tur ciudadano.
Eman a pone enfasis riba e importancia pa prosperidad economico no keda limita na cifranan positivo, sino cu e mester ta refleha su mes den calidad di bida di e poblacion. E progreso mester yega na cada bario y cada famia, pa tur ciudadano por sinti e beneficionan di e desaroyo di su pais. Prome Minister Eman a indica cu durante su bishita na Corsou el a comparti e pensamento aki cu e parlamentarionan y gobierno. El a observa cu Prome Minister Pik Pisas tambe a pone enfasis riba e importancia di bienestar di e poblacion, caminda no solamente e cifranan economico ta conta, pero tambe e felicidad y calidad di bida di e ciudadanonan. Eman a destaca cu e enfoke riba bienestar y e reparticion husto di prosperidad ta un prioridad cu Aruba y Corsou ta comparti.
Celebracion a continua cu acto protocolario na Brionplein
Despues di e reunion solemne na Parlamento di Corsou, e dignatarionan a crusa di Punda pa Otrobanda, canando riba Emmabrug, pa participa na e acto protocolario na Brionplein. Durante e ceremonia a tuma luga desfile di gruponan uniforma, hisamento di bandera y canto di himno di Corsou, sigui pa un discurso di Minister Charetti Maria America-Francisca y tambe Prome Minister Gilmar “Pik” Pisas. E programa a inclui tambe diferente presentacion cultural, celebrando historia, identidad y autonomia di pueblo di Corsou.
Prome Minister Mike Eman a presencia e acto hunto cu e mesun dignatarionan regional cu un dia prome a participa na e Caribbean United in Excellence Summit, cu a reuni varios lider di diferente pais di Caribe pa dialoga tocante cooperacion regional, desaroyo economico y oportunidadnan comparti. Participacion di Prome Minister Eman na e conmemoracion di Dia di Corsou ta forma parti di su bishita oficial na nos isla ruman, durante cual el a participa na diferente encuentro pa fortalece e relacionnan entre Aruba, Corsou y otro paisnan den region.
Prome Minister Mike Eman ta felicita e pueblo di Corsou riba nan dia y expresando su alegria di por comparti e momento historico aki cu nan.
