E Evangelio di awe ta pa pone nos reflexiona riba e buskeda di señalnan y e conversion berdadero di curason. Nos ta biba den un mundo den cual hende constantemente kier wak señalnan externo como prueba di nan fe. Cuanto bes nos mes a busca un señal pa confirma nos creencia of decisionnan? Si nos compara nos mes cu e generacion cu tawata kier un señal di Hesus pa verifica su mensahe y e hendenan di Ninive cu tawata habri pa kere e mensahe di Dios treci pa Jonas y a converti; ta cua di nan dos nos ta parce mas? Nos por bisa cu siguransa cu nos ta manera e hendenan di Ninive? Hesus pa su morto y resureccion a converti su mes den e señal definitivo pa tur generacion te na final di tempo. P’esey nos no mester tin duda. Den nos buskeda nos mester bay den e interior di nos ser. Ta den e intimidad di nos ser Dios ta topa cu nos. Y E mes lo guia nos y haci nos experiencia e conversion berdadero di nos curason. Pa asina den tur libertad nos por stima Dios mas cu tur cos y nos prohimo manera nos mes!
Oracion: Santo Dios, duna nos curashi pa proclama Hesus Resucita, e señal di fe berdadero, na mundo henter. Amen.
