Riba 1 di juli 2026, dia di Emancipacion, a keda oficialisa e “Fundacion Virginia Demetricia Aruba” na New Leaf Notary. E fundacion lo enfoca riba e historia, bida y legado di Virginia Demetricia, y lo keda encarga cu un amplio cantidad di asuntonan cu ta regarda e personahe historico aki.
Dialuna 12 di october, continente Americano – inclusive Aruba – ta conmemora Dia di Indigenidad, pues ta un bon momento pa presenta e informacion aki pa comunidad di Aruba. E prome parti di America cu Europa a conoce na 1492 tabata Caribe, y e cultura indigena cu tabata aki pa varios milenio caba tabata e prome pa confronta e choke di culturanan cu a sigi.
Virginia, naci na 1842 tabata un muchamuher esclavisa y, segun informacion for di documentonan di Archivo Nacional (ANA), di origen mas tanto indigena Arubano. Ela protesta na varios manera y varios biaha contra e opresion di sclavitud Hulandes bou di cual e y su hendenan tabata sufri. Ela ricibi castigonan pisa y despues a wordo bendi y exilia pa Corsou. Tur esaki na e edad fragil di un hobencita di 16 aña.
Awe, pa su edad hoben y pa su consciencia y activismo fuerte pa husticia y igualdad, Virginia por wordo compara cu Anne Frank durante segundo guera mundial, y tambe cu Greta Thunberg, conocido activista global hoben di awendia. Esaki teniendo cuenta cu circunstancianan hopi diferente.
E idea pa e fundacion a cuminsa na 2023 ora cu na Hulanda (Ymere, Amsterdam) a traha un bario cu e tema di “Vrijheidsstrijders”. Virginia, hunto cu Tula y Anton de Kom, a haña un edificio grandi cu su nomber y imagen, y tambe un caya yama “Virginia Straat”. A peticion di Hulanda, Archivo Nacional a tuma contacto cu famia di Virginia, sra. Shanoulle Bikker, y despues hunto cu sra. Wilma Kuiperi-Jansen y demas famia a coopera pa un proyecto pa un imagen di Virginia mas corecto posibel .
Esaki a coincidi cu e tempo cu Premier Rutte y Rey Willem Alexander di Hulanda a pidi despensa y pordon pa e era y consecuencianan di sclavitud pa e culturanan indigena y Africano.
A base di tur esaki a crea un fundacion na Aruba cu a nase for di seno di descendientenan directo di Virginia su famia. Prome, e famia grandi Bikker y demas famianan casa a bin hunto pa promer biaha na Archivo Nacional pa un reunion grandi di informacion y concientisacion. Un aña despues, a crea e fundacion cu su directiva consistiendo di sra. Wilma Kuiperi-Jansen, Presidente, sra. Nadine Krosendijk, Secretaria, y sra. Giselle Pichardo, Tesorera, y miembronan sr. Benny Bikker y sra. Shanoulle Bikker.
E fundacion depues a organisa otro evento di introduccion pa invitadonan y Gobierno. Museo Arquelogico Aruba a habri su salanan pa e fundacion, y Archivo Nacional a duna un presentacion tocante e ultimo desaroyonan genealogico encuanto Virginia Demetricia. Minister Wyatt-Ras y Minister Herdé, representando Minister di Cultura Eman, tabata presente Sr.Edric Croes di A.N.A. a propone tambe pa e fundacion introduci un evento anual cu e.o. lecturanan bou nomber di Virginia, cu cual sigur e fundacion lo bai cumpli. E publico presente a expresa hopi aprecio y entusiasmo pa e iniciativa aki.
Lo re-introduci, investiga, y promove e legado corecto di Virginia na e comunidad local y internacional, entre otro como simbolo di e resiliencia historico di e pueblo di Aruba. Investigacion lo haña un luga importante, manera p.e. e recien investigacion tocante e relacion di Cas Real Hulandes cu sclavitud. Lo coopera e.o. cu Archivo Nacional, Gobierno y otro instancianan y investigadornan internacional. Ademas por conta riba e amplio experiencia pedagogico y di maneho cultural di e directiva nobo.
Fundacion Virginia ta desea di gradici pa nan contribucion sr. Raymond Hernandez, Director, y sr. Edric Croes, investigador di Archivo Nacional, sr. Harold Kelly Director interino y personal di Museo Arquelogico, Notario sra. Chamila Tromp y personal di New Leaf Notary, sra. Marilis Becker pa su bunita obra teatral. Tambe sra. Diana Bikker MC, sra. Sharla Koolman y demas voluntarionan, Sra. Lara Kuiperi pa su diseño di e logo oficial, y sra. Kat Fowler y Nadine Krosendijk pa e live-streaming internacional. Finalmente kier gradici tur miembro di e famianan envolvi pa sostene e fundacion cu nan interes, informacion y dedicacion.
Fundacion Virginia Demetricia Aruba ta urgi pueblo di Aruba pa tuma contacto via email fundacionvirginiaaruba@gmail.com. pa cualkier pregunta of informacion.
