Durante un encuentro na Plaza Lolita, San Nicolas, dia 12 di october, Minister di Turismo, Transporte y Labor, Wendrick Cicilia, conhuntamente cu demas Ministernan di Gabinete AVP-FUTURO a presenta diferente proyecto pa mehora infrastructura, espacio publico y facilidadnan recreativo. E enfoke ta pa e desaroyo di turismo contribui directamente na calidad di bida di nos comunidad.
Asfaltamento di Seroe Colorado
Despues di mas cu 30 aña, mas di 3.5 kilometer di caminda ta haya asfalt nobo, cu un inversion di casi 3 miyon florin. E tres fasenan ta cubri T-weg na Kamini’s te Anker, Anker te bushalte I Love Aruba y e subida te Seroe Colorado Lookout Point. Trabounan a inicia 5 di october y ta premira pa termina 23 di december 2026. E proyecto, inicia riba peticion di Minister Cicilia, ta conta cu colaboracion di Minister di Infrastructura, Rene Herde y sosten financiero di Aruba Tourism Authority. Lo inclui marcacion y reflectornan pa mehora siguridad. Fase 4 richting Baby Beach y Rodgers Beach ta planifica pa 2027.
Mehoracionnan na Eagle Beach
E proyecto ta inclui reconstruccion di caminda y parkeo, camindanan pa peaton, acceso pa rolstoel, areanan berde y un muraya pa proteha santo blanco y turtuganan. E destaho publico a inicia 7 di october, cu entrega di oferta te 6 di november. Inicio di trabou ta planifica pa januari 2027.
Facilidadnan nobo na Casibari
Casibari lo haya baño publico nobo, incluyendo un baño adapta pa personanan cu discapacidad. Durante construccion lo tin un baño temporal disponibel. Tambe lo mehora caminda, parkeo pa bus, auto y UTV y iluminacion. E trabounan sanitario ta planifica pa november 2026. Na Ayo lo desaroya facilidadnan sanitario similar.
Masterplan Zeewijk
E plan ta contempla kiosco, entretenimento musical, playground, area di picnic, veld deportivo, palapanan y mas parkeo. Den 2027 lo haci estudio pa evalua e mehoracionnan necesario pa facilita uzo di lama pa landamento. E concepto final ta premira pa november 2026, cu inicio di trabou den juni of juli 2027, si e procesonan cana segun plan.
Masterplan Pos Chikito
Un structura artistico den forma di pisca riba e rotonde lo honra e tradicion di piscamento di e bario. E proyecto ta inclui un parke publico, plataforma di observacion, gym den aire liber, parkeo mehora y un espacio prominente pa e reconocementonan existente. Inicio di trabou ta premira pa mei 2027.
Continuacion di Masterplan Baby Beach
E siguiente fase ta inclui un kiosco, asfalt for di misa te Rodgers Beach, reubicacion di Big Mama Restaurant y reorganisacion di caminda dilanti di ex-Nanki Club. Tambe lo agrega playground, gym den aire liber, facilidadnan di sinta y parkeo publico. Trabounan ta planifica pa juni of juli 2027.
Embeyecemento di Anker
E plan ta contempla acceso pa rolstoel, bankinan, reorganisacion di trafico y parkeo pa auto y bus, cu respet pa balor historico y naturalesa rond di e monumento. Gobierno ta den dialogo cu representantenan di Charlie’s Bar pa coordina e proyecto, cu inicio premira pa april 2027.
Masterplan Carnival Village
Cu participacion di e usuarionan, lo desaroya un plan cu bañonan publico, area di sinta, podium permanente, parkeo y un letrero iconico di San Nicolas. DOW lo inicia e licitacion pa oficinanan di arkitectura den october 2026. Seleccion ta premira pa januari 2027 y inicio di trabou pa augustus 2027.
Minister Cicilia a enfatisa cu e proyectonan ta enfoca riba espacio mas sigur, accesibel y funcional, unda comunidad, cultura y recreacion tin un luga central.
13 di october 2026
