Durante un encuentro na Plaza Lolita, San Nicolas, dia 12 di oktober, Minister di Salubridad, Asunto Social, Cuido di Adulto Mayor y Maneho di Adiccion, drs. Melvin G. Wyatt-Ras, conhuntamente cu e demas Ministernan di Gabinete AVP-FUTURO, a presenta diferente proyecto enfoca riba cuido di salud, sosten social, bienestar di adulto mayor y tratamento di adiccion. E proyectonan aki tin como meta fortalece e cuido y sosten pa pueblo di Aruba y contribui na un miho calidad di bida.
Minister Wyatt-Ras a enfatisa cu hopi trabou a wordo haci, pero cu ainda tin hopi pa haci. E Minister a reconoce cu costo di bida ainda ta pone presion riba hopi famia. Den e contexto aki, el a menciona entre otro e aumentonan di bijstand, schooltoeslag, reparatietoeslag y AOV, sosten pa material escolar y medidanan relaciona cu AZV.
Expansion di Pasadianan y vivienda pa adulto mayor
Ministerio ta sigui traha riba expansion di Pasadianan y desaroyo di vivienda adapta na necesidadnan di adulto mayor, cu e meta di yuda nan keda activo, mantene contacto social y conserva nan independencia. Apertura di The Sunshine House na San Nicolas, e tercer Pasadia di Fundacion Centro Famia Piedra Plat, ta un paso concreto den e direccion aki.
Cuido multidisciplinario pa diabetes na ImSan
E programa di cuido multidisciplinario na ImSan ta reuni dokter di cas, specialistanan y otro profesionalnan di salud pa brinda personanan cu diabetes tratamento mas coordina y personalisa. E enfoke ta inclui atencion pa alimentacion y estilo di bida, cu e meta di mehora control di diabetes, preveni complicacionnan y promove un miho calidad di bida.
Digitalisacion di Departamento di Asunto Social
Ministerio ta prepara e prome fase di digitalisacion di Departamento di Asunto Social, cu ta inclui un sistema nobo pa registra informacion y sigui peticionnan di Bijstandverlening, Guia Social, Kostenloze Bijstand y Bida y Famia. E meta ta simplifica procesonan, mehora seguimiento y brinda ciudadanonan un servicio mas eficiente.
Institucion specialisa pa cuido di adiccion
Den colaboracion cu Ministerio di Husticia y partnernan den sector di salud, Ministerio ta preparando e desaroyo di un institucion specialisa pa personanan cu problemanan compleho di adiccion, incluyendo esnan cu tambe ta enfrenta problema di salud mental. E plan ta inclui un facilidad di cuido sera, cu e meta di brinda tratamento y guia specialisa, enfoca riba recuperacion y reintegracion den comunidad.
Otro prioridadnan di Ministerio
Den Salubridad, Ministerio ta traha riba e Plan Nacional di Salud Mental y Prevencion di Suicidio, cu ta den desaroyo, y iniciativanan pa prevencion di obesidad.
Den Asunto Social, Ministerio ta pone enfasis riba prevencion di violencia domestico y sosten pa personanan cu limitacion.
Den Cuido di Adulto Mayor, Ministerio ta traha riba desaroyo di un Helpdesk pa brinda informacion y guia na adultonan mayor y nan famianan, y un Meldpunt pa reporta caso sospechoso di maltrato of negligencia.
Den Maneho di Adiccion, Ministerio ta fortalece bemoeizorg pa acerca ayudo na personanan cu ta dificil pa alcansa, mientras preparacion ta sigui pa facilidadnan di detoxificacion y observacion.
Pa Minister Wyatt-Ras, e proyectonan aki no ta trata solamente di edificio, sistema of inversion, sino di hende: nos adultonan mayor cu merece un bida activo, personanan cu diabetes cu mester cuido coordina, famianan cu ta busca sosten y personanan cu ta lucha cu adiccion y mester un oportunidad pa recupera.
Cu e proyectonan y iniciativanan aki, Ministerio ta sigui traha pa fortalece cuido y bienestar den nos comunidad, cu e meta di contribui na un Aruba mas fuerte pa nos tur.
