Diaranson mainta, Gobierno di Aruba a firma un acuerdo di financiamento cu Algemeen Pensioenfonds Aruba (APFA) pa e arreglo di pensioen NPRfit. Cu e firma aki, Pais Aruba ta bira e prome dunado di trabou cu ta afilia na e arreglo nobo di APFA, brindando mas di 550 trahado cu contract di trabou (arbeidscontractanten) den servicio di Gobierno e oportunidad pa acumula pensioen y brinda nan mas seguridad financiero pa nan futuro.
E ceremonia oficial a tuma luga na APFA, den presencia di Minister-President mr. Mike Eman, Ministro di Husticia mr. drs. Arthur Dowers y Ministro di Finansa, Asunto Economico y Sector Primario, mr. Geoffrey Wever, hunto cu representantenan di DRH, Directie Financiën y APFA.
E acuerdo ta representa un paso importante pa e trahadonan di Pais Aruba cu ta traha bou di un contract di trabou y cu no ta cay bou di e arreglo di pensioen regular pa ambtenaarnan. Pa hopi aña, e grupo aki no tabata tin e mesun oportunidad pa acumula pensioen mediante contribucion di nan dunado di trabou. Cu e acuerdo di awe, Gobierno ta establece un arreglo cu ta permiti e trahadonan aki participa den un sistema di pensioen administra pa APFA.
Minister Geoffrey Wever a enfatisa cu e situacion di trahadonan cu contract di trabou den servicio di Pais Aruba tabata merece atencion. Minister Wever a haci referencia na e Landsverordening Algemeen Pensioen (LAP), cu pa hopi aña ta regla e participacion den pensioen pa trahadonan den sector priva. Segun minister Wever, Gobierno, den su rol como dunado di trabou, mester presta e mesun atencion na e seguridad di pensioen di su propio empleadonan cu no ta cubri bou di e arreglo di pensioen pa ambtenarnan.
“Pa hopi aña nos tin trahadonan cu ta duna nan contribucion na servicio di Pais Aruba, algun di nan durante un periodo di gobernacion, sin cu Pais Aruba tabata contribui na un arreglo di pensioen pa nan. Nos a considera cu esaki tabata un situacion cu mester cambia. Como dunado di trabou, Gobierno tin e responsabilidad di atende tambe e futuro financiero di e grupo di trahadonan aki”, minister Wever a expresa.
Segun Minister Wever, desde entrada di e Gobierno actual, e asunto aki a haya prioridad. Expertonan di Departamento di Recurso Humano (DRH) y Directie Financiën, den colaboracion cu APFA, a traha riba e preparacion di un solucion di pensioen cu ta realistico, pagabel y sostenibel.
NPRfit ta un arreglo di pensioen cu APFA a introduci na 2024, cu ta brinda dunadornan di trabou mas flexibilidad pa adapta nan arreglo di pensioen na e necesidadnan di nan organizacion y nan capacidad financiero.
Pa e arbeidscontractanten di Pais Aruba, e arreglo ta contempla un acumulacion di pensioen di 1,75% di e base di salario pa pensioen pa cada aña di servicio. Ademas, e arreglo ta inclui un pensioen pa sobrevivientenan, calcula riba 5/7 parti di e pensioen di behes proyecta, cu cobertura riba base di riesgo durante participacion activo. Esaki ta significa cu e trahadonan participante lo por acumula un pensioen adicional na nan AOV, mientras cu e arreglo ta brinda proteccion financiero pa nan famianan den e circunstancianan defini den e reglamento.
E edad regular di pensioen den NPRfit ta 65 aña. E arreglo ta brinda tambe diferente opcion di flexibilidad, incluyendo posibilidad pa acumula pensioen adicional y, bou di cierto condicion, adapta e momento y forma di pago di pensioen.
Pa yega na e firma di awe, APFA y Gobierno di Aruba a completa un trayecto di preparacion cu a inclui calculacionnan financiero, evaluacion di diferente scenario y reunionnan di coordinacion. E meta tabata pa establece un arreglo cu ta brinda un beneficio concreto na e trahadonan, mientras cu e obligacionnan financiero pa e dunado di trabou ta keda claramente defini y sostenibel.
Pa minister Wever, e aspecto financiero ta esencial. Un arreglo di pensioen no ta limita na e beneficio cu e participante ta ricibi, e ta exigi tambe un compromiso continuo, planificacion y administracion responsabel di e obligacionnan cu Gobierno ta asumi como dunado di trabou.
Cu e firma di e acuerdo di financiamento, Gobierno di Aruba y APFA ta formalisa nan colaboracion y e responsabilidannan relaciona cu e ehecucion di NPRfit pa e grupo di trahadonan aki.
Pa APFA, e acuerdo tin un significado particular, mirando cu Pais Aruba ta e prome dunado di trabou cu ta incorpora su personal na NPRfit. Segun informacion comparti durante e ceremonia, e incorporacion di aproximadamente 550 participante nobo ta representa un crecemento di 12% den e cantidad di participantenan activo di APFA.
APFA a indica cu e fondo actualmente ta administra aproximadamente Afl. 4 miljard den capital di pensioen y cu su grado di cobertura neto na final di september tabata 113%. E cifranan aki ta brinda contexto riba e posicion financiero di e institucion cu lo administra e pensioen di e participantenan nobo.
Minister Wever a expresa su aprecio na Minister-President Mike Eman, Ministro Arthur Dowers, Conseho di Minister, APFA y tur e expertonan y empleadonan di Gobierno cu a contribui na e proceso.
Minister Wever a remarca especialmente e colaboracion entre Departamento di Recurso Humano, Directie Financien y APFA, cu a haci posibel pa traduci e necesidad identifica den un arreglo concreto.
Cu e firmamento aki, Gobierno di Aruba ta formalisa su participacion como prome dunado di trabou den NPRfit y ta crea e posibilidad pa mas di 550 arbeidscontractant acumula pensioen mediante APFA. E acuerdo ta marca asina un paso importante den e ampliacion di provision di pensioen pa trahadonan cu contract di trabou den servicio di Pais Aruba, cu atencion tanto pa seguridad di e empleadonan como pa cumplimiento responsable di e compromisonan financiero di Gobierno.
