Prome Minister Mike Eman a continua cu su bishitanan semanal den bario, unda manera costumber hunto cu diferente instancia gubernamental y organisacion, a bishita habitantenan di Sabana Basora Noord. Durante e recorido, e prome minister a scucha personalmente e preocupacionnan di e habitantenan, cu atencion special pa limpiesa di e bario, mantencion di facilidadnan recreacional y scucha preocupacion di varios famia cu ta biba cu un entrada limita. Na e bishita a participa representante di Bureau City Inspector (BCI), GKMB, Polis di Bario, FCCA. Tambe tabatin personal di Serlimar y DOW y Fundacion Luna pa atende situacion relaciona cu cacho, y trahado social pa brinda asistencia na persona cu ta enfrenta reto social.
Prome Minister Eman a expresa su satisfaccion cu e bon recepcion di e habitantenan y specialmente cu e oportunidad pa trece diferente servicio directamente den e comunidad. Un di e problemanan cu a resalta ta e acumulacion di sushi durante añanan den varios area y den cura di e casnan. E situacion aki ta afecta e limpiesa y calidad di bida den barro, y ta rekeri atencion di e instancianan concerni. Durante e recorido, varios habitante a presenta nan preocupacion relaciona cu mantencion di nan cas y bario. E prome minister a indica cu gobierno ta traha den cooperacion cu FCCA pa atende e necesidadnan den e bario aki. El a haci referencia tambe na diferente trabou di mantencion y proyectonan di infrastructura cu ta tumando luga den otro bario como por ehempel na Mabon, De Vuyst y Bushiri, como parti di e esfuerso pa mehora e calidad di bida di nos pueblo.
Preocupacion tocante salario minimo y costo di bida
Un di e temanan cu a haya atencion special durante e bishita ta e situacion economico di e famianan cu ta depende di salario minimo. Segun Prome Minister Eman, varios habitante a comparti nan preocupacion tocante e dificultad pa cubri nan gastonan basico cu e entrada cu nan ta ricibi. E prome minister a destaca cu, a pesar di e aumento di pension cu gobierno a realisa, ainda tin un grupo di ciudadano cu ta enfrenta dificultad financiero. El a menciona particularmente personanan cu durante 20 of 30 aña a traha pa salario minimo, sin a logra acumula suficiente reserva financiero pa nan futuro. Awor cu algun di nan ta acercando edad di pensioen, nan ta enfrenta e realidad di no tin suficiente medio financiero pa mantene un calidad di bida digno. Den e contexto aki, Prome Minister Eman a reafirma e importancia di e esfuersonan di e coalicion den gobierno pa aumenta salario minimo gradualmente. E intencion ta pa durante un periodo di tres aña, cuminsando otro aña, aumenta salario minimo pa acerca e na e nivel necesario pa cubri e necesidadnan basico di existencia (bestaansminimum). Segun Eman, e contacto directo cu e habitantenan ta reforsa e necesidad pa sigui traha riba manera cu ta mehora e poder di compra y bienestar di e ciudadanonan cu tin un entrada limita.
Desaroyo economico mester refleha den bienestar di tur ciudadano
Prome Minister Eman a resalta cu Aruba ta registra un desaroyo economico impresionante, cu cifranan positivo, pero cu e prosperidad economico aki ainda no ta yega na tur bario y tur hogar. Durante su bishitanan den bario, el a constata cu ainda tin hopi famia cu ta biba na margen di pobresa, a pesar di e crecemento economico cu Aruba ta experimenta. E prome minister a enfatisa cu precisamente pa e motibo aki, e bishitanan semanal den bario ta sumamente importante. Nan ta permiti pa gobierno conoce e realidad di e habitantenan, compronde e retonan cu nan ta enfrenta y identifica unda accion concreto ta necesario. Eman a expresa tambe cu lo ta valioso pa e representante di diferente sector y gremio participa den e tipo di recorido aki, pa nan por conoce di cerca e realidad di e personanan cu ta biba cu un entrada limita. Segun e prome minister, e experencia aki ta contribui na un comprension mas completo di e relacion entre crecemento economico y bienestar social.
Cu e bishita na Sabana Basora Noord, Prome Minister Mike Eman ta reafirma su compromiso pa mantene contacto directo cu e comunidad y sigui traha hunto cu e instancianan concerni pa atende e necesidadnan di cada bario. E meta ta pa e progreso economico di Aruba no keda limita na cifra positivo, sino cu e por sinti tambe den e calidad di bida di cada famia Arubano.
