Minister Gerlien Croes ta expresa su firme respaldo y orguyo na Federacion di Ahedres di Aruba (FAA) y Korrectie Instituut Aruba (KIA) pa e participacion di Aruba den e di 6 Campeonato Intercontinental di Ahedres pa Preso – Chess for Freedom, cu a tuma luga online di 13 pa 15 di october 2026.
E iniciativa internacional aki ta uza ahedres como un herment constructivo pa promove desaroyo personal, disciplina, pensamento strategico y inclusion social. Despues di un aña y mey di trabou continuo cu e proyecto aki na Aruba, e resultadonan positivo ta visibel, demostrando cu deporte y educacion por habri caminda pa oportunidadnan nobo y un miho futuro.
Un participacion historico y ehemplar
Pa e edicion aki, Aruba ta wordo representa pa un total di 17 participante, reparti den tres ekipo cual ta Ekipo di Hubentud (Youth Team) cu 6 participante cu a logra di cuater luga, Ekipo di Strafafdeling cu 6 participante y tambe Ekipo di HVB cu 5 participante cu a termina na di cuater y tres luga.
“Ahedres ta hopi mas cu un simpel wega. E ta un instrumento educativo cu ta siña e participantenan pensa di forma critico, tuma decision consciente, cultiva pasenshi y analisa e consecuencianan di nan escogencia,” e Minister a duna di conoce. “Nos ta specialmente contento di mira e expansion di e proyecto aki pa e hobennan den KIA. Duna nan e oportunidad di competi na nivel internacional y representa nos isla ta un paso significante den nan proceso di reintegracion y crecemento personal.”
Reconocemento y compromiso di apoyo
Ministerio ta extende un caluroso gratitud y reconocemento na e ekipo coordinado y voluntario cu ta haci e proyecto aki un realidad. Ministerio ta reitera su compromiso pa sigui colabora cu Federacion di Ahedres di Aruba pa sigura cu e programa aki tin e ekipamento y e recursonan necesario pa sigui crece y yega na mas participante den futuro.
“Inverti den deporte y educacion den tur skina di nos sociedad ta un inversion den ser humano. Nos ta felicita tur e tres ekiponan di Aruba cu a competi den e campeonato aki. Boso esfuerso y dedicacion ta un ehempel cu cambio positivo semper ta posibel.”
