E Prome Minister di Sint Maarten, Dr. Luc Mercelina, a expresa su satisfaccion cu e reunion cu Prome Minister di Aruba, Mike Eman, durante su bishita na Hulanda. E encuentro a brinda oportunidad pa intercambia pensamento tocante e cooperacion entre Aruba y Sint Maarten, como tambe e vision cu e paisnan ta desea presenta durante e proximo Kingdom Summit den luna di november.
E prome mandatario a expresa su aprecio pa e trayectoria di Mike Eman y e importancia di su contribucion na pueblo di Aruba. E prome minister di Sint Maarten a destaca cu nan a intercambia idea tocante e relacion di trabou entre nan paisnan y e manera cu Reino Hulandes por funciona miho den futuro.
E diferencia entre e paisnan como un fortalesa
Segun Mercelina, e futuro di Reino Hulandes mester basa riba un reconocimento mas grandi di e diferencia entre su paisnan. E prome minister a explica cu, en bes di enfoca solamente riba e similaridadnan, ta importante pa reconoce e diferencia den cultura, experencia y posicion di cada pais. Den su vision, precisamente e diversidad aki por contribui na un Reino mas fuerte.
Un otro elemento importante den e pensamento di Mercelina ta e necesidad pa e paisnan di Reino sinti nan mes como copropietario di e estructura comun. Mercelina a splica cu e relacion mester evoluciona di un modelo den cual e paisnan ta solamente participante, pa uno den cual nan ta comparti responsabilidad y ta activamente involucra den decision cu ta afecta nan futuro. Segun e prome minister, ora e paisnan ta sinti nan mes como copropietario, nan compromiso cu e cooperacion ta bira mas grandi. Esaki por contribui na un relacion mas estrecho entre e paisnan di Reino. Mercelina a indica cu durante su reunion cu Eman nan a intercambia e pensamento aki y cu el a haya un vision comparti tocante e importancia di un Reino cu ta brinda beneficio pa tur su paisnan.
Cooperacion mester contribui na bienestar di pueblo
Mercelina a destaca cu e cooperacion den Reino mester traduci den trece mehora concreto pa e habitantenan di e paisnan Caribense. Segun e prome minister di Sint Maarten, pa demasiado tempo e paisnan a concentra riba dialogo, mientras cu e poblacion ta sperando resultado cu por mehora nan calidad di bida.
Den su vision, ta importante pa Reino aspira na un nivel basico di calidad den e areanan esencial manera enseñansa, salud y husticia. Mercelina ta considera cu cooperacion den e areanan aki por contribui directamente na bienestar di pueblo y crea mas siguridad pa e habitantenan di Reino. E prome minister a destaca cu su bishita na Hulanda no ta enfoca solamente riba buskeda di sosten financiero, pero principalmente riba un cambio di mentalidad y un manera nobo di cooperacion.
Mas participacion den asunto exterior
Un otro tema cu Mercelina a destaca ta e necesidad pa e paisnan Caribense tin mas participacion den e maneho di asunto exterior di Reino. E prome minister di Sint Maarten a explica cu decision internacional cu ta afecta Reino mester wordo comparti cu e paisnan Caribense na tempo, pa nan por participa den e proceso. Durante su bishita na Hulanda, Mercelina a reuni cu Minister di Relacionnan Exterior, Tom Berendsen, y a solicita pa explora e posibilidad di tin representacion fisico di e departamento di relacionnan exterior na Sint Maarten.
Aruba y Sint Maarten preparando pa Kingdom Summit
E intercambio entre Mercelina y Eman a tuma luga den preparacion pa e prome Kingdom Summit, cu lo celebra dia 17 y 18 di november 2026 na Sint Maarten. Durante e encuentro, e cuater paisnan di Reino lo intercambia vision tocante e oportunidadnan pa reforsa nan cooperacion, cu respet mutuo pa e posicion di cada pais.
Mercelina a califica su reunion cu Eman como fructifero y a destaca e importancia di continua e dialogo tocante un Reino cu ta reconoce e balor di cada pais y cu ta contribui na bienestar di su habitantenan.
