Nos ta bibando den un tempo hopi trabahoso, un tempo den cual hopi falta ta wordo tira riba nos hubentud, y bo kier puntra bo mes kico ta pasando, nos hobennan ta culpabel, complice, of victima?
Ta na unda nan a sinja, for di ken nan a hereda tanto malcriansa, rebeldia y malicia?
Nos ta den un situacion hopi serio den cual hopi hende ta laba man for di nan yiu, y bisa cu ta internet, facebook, mal amistad a danja nan yiu
Mayor cu no kier para responsabel pa su propio Falta di amor, Falta di pordon, y negligencia di su propio famia.
E ta cuminsa na cosnan chikito, cu despues di tempo tin resultado grandi y doloroso, pasobra abo como mayor no a duna bon ehempel na bo yiu.
Laga nos tene cuenta cu lo siguiente pasobra hopi biaha decision tuma pa mayor awe, ta un carga pa su yiu pa semper.
Abandono di Hogar, Adulterio, Abuso ta cosnan cu lo keda den mente di un mucha pa semper.
Pasobra ora adulterio drenta via homber of muher ta henter bo famia bo a traiciona.
Sinja un mucha bebe for di chikito.
Sinja un mucha droga for di chikito , bisando cu marihuana no ta malo.
Amarga un mucha su bida door di lanta rabia den dje , sea fisico of verbal.
Sinja un mucha conta bringa cu arma blanco of cu arma di candela.
Haci malo den bista di mucha y obliga nan pa keda keto, sea horta of destrui cos di hende, por ehempel dal auto di hende y sigi corre bay.
Traha yiu pafor di matrimonio y bisa bo yiu cu no ta nada.
Biba un bida sinberguensa y no cumpli cu debernan.
Sinja un mucha ganja y sconde cos.
Sinja un mucha kere den bruheria.
Sinja un mucha con pa bende su curpa.
Usa un mucha pa gana placa.
Sinja un mucha con e tin cu manipula su frei pa abo hanja placa.
Sinja un mucha vengansa contra su mama of su tata.
Sinja un mucha pa no perdona pero keda di biba den pasado pa un fout cu abo como mayor a haci.
Pa motibo di divorcio usa malicia y placa pa kita yiu, for di nan tata of di nan mama.
Sinja un hoben con pa biba den pica y no casa biba un bida drechi.
Sinja un mucha con ta expresa su mes vulgarmente, un boca yena cu palabra sushi.
Un hoben tin derechi pa scohe un bida drechi, pasobra e mester renoba su mente y busca pa conoce e boluntad di Dios pa su bida, y no biba den e boluntad di maldad di su mayor.
Un hoben mester aplica Romanonan 12;2 den su bida, mescos tambe Efesionan 4:29.
Hopi biaha conducta di mayor ta pone hende bay contra nan yiunan, pasobra e mayor a haci malo y nunca e a drecha locual cu e danja, nunca e pidi despensa, pero a laga orguyo domina su bida, y pa su falta hende ta sera porta pa su yiunan.
Ora un mayor no ta coregi su yiu, tampoco disciplina su yiu, e ta criando un problema pa sociedad completo.
Curason di un yiu no por wordo cumpra cu cosnan digital, auto of brommer caminda e mayor sa bon bon cu e no tin edad pa maneha ningun di nan.
Ta deber di tur mayor pa lanta nan yiu den caminda di Senjor, pa asina e mucha lanta firme cu bon karakter, integro, decente, cu respet pa su mes y pa tur hende.
Esey ta locual cu Dios kier.
Sinceramente, Pastor Marcel Balootje.
