Na Hulanda, Prome Minister Mike Eman a bolbe sinta pa un entrevista special cu Ferry Floor, creador y presentador di e serie di YouTube De Burgemeester. E encuentro a tuma luga na De Eendracht in ‘t IJkgebouw na Alkmaar. Durante e entrevista, Floor y Eman a repasa diferente momento di su trayectoria politico a base di fotonan, incluyendo su experiencia como Prome Minister di Aruba y e 1 aña y 9 luna den su di tres gabinete.
Ferry Floor a splica cu el a lansa e programa cuatro aña pasa, motiva pa su propio interes den e funcion di burgemeester. E serie ta brinda publico un bista personal di e bida, responsabilidad y reto di esnan cu ta lidera e comunidad. Segun Floor, e aña aki nan a haci un excepcion pa entrevista Prome Minister Mike Eman di Aruba. Como un adelanto di e episodio, Floor a revela cu un di e preguntanan cu mas tabata interesa tabata e historia tras di e snor caracteristico di Mike Eman.
E episodio special lo wordo publica dia prome di januari 2027. Na final di e encuentro, Prome Minister Eman a entrega un obra di arte traha di palo cu ta e escudo di Aruba den un compas na Ferry Floor, como recuerdo simbolico y invitacion pa su ekipo bolbe bishita Aruba.
