Durante e conferencia di prensa e siman aki, lider di fraccion di MEP Evelyn Wever-Croes a expresa un biaha mas su preocupacionnan tocante e crecemento di turismo y e impacto di overtourism riba e calidad di bida di e pueblo Arubiano.
MEP a pidi caba pa Parlamento tuma un rol mas activo den e dialogo cu e sector turistico, cu e meta pa determina cuanto mas Aruba por carga y cua medida ta necesario pa move den direccion di un modelo di “High Value, Low Impact”.
Den e prome reunion cu Aruba Tourism Authority (ATA), a bira cla cu ATA tambe ta preocupa pa e volumen creciente di turista y ta busca stabilisacion, cu solamente espacio limita pa crecimiento. Sin embargo, no tur stakeholder ta comparti e vision aki.
MEP a pidi pa amplia e dialogo cu otro stakeholdernan importante, incluyendo Aruba Airport Authority (AAA) y Aruba Ports Authority (APA). A pesar di e insistencia di MEP, e reunionnan adicional ainda no ta wordo yama pa e presidente di e comision di turismo den Parlamento.
Tampoco di parti di Gobierno, MEP no ta mira accion concreto ni un vision cla pa enfrenta e reto aki. Segun MEP, e situacion aki no por sigui sin direccion ni liderasgo.
“Nos no por sigui papia di crecemento sin puntra cuanto mas nos isla por carga. Gobierno mester tuma su responsabilidad y Parlamento mester cumpli cu su rol di control y busca di solucion.”
MEP lo sigui insisti pa amplia e dialogo y pa Aruba avanza na un turismo cu ta genera prosperidad, sin sacrifica e calidad di bida di nos pueblo.
No High Value, Low Impact: pa un Aruba dushi pa biba y dushi pa bishita.
