Danki Hesus, pa mustra nos, cu dilanti di cada decision importante cu nos mester tuma, nos mester bay cerca Tata den oracion; papia cu Dios, scucha loke E kier papia den nos alma. Papia cu Dios ta facil, pero pa nos siña scuch’E, ha…esey ta un reto! Hesus a permanece henter un anochi den comunion cu su Tata, pa asina E por bay den fe y scoge 12 apostel, 12 persona cu lo cana hunto cu nE den mision. Pa scoge algun entre tanto discipel cu tabata sigui’E no tabata un decision facil. Abo tambe a yega di pensa, si tabata boluntad di Dios, pa Hesus a scoge hasta un apostel cu despues lo a traicion’E? E apostelnan tabata refleho di Hesus y nan tabata tambe testigo di obranan maraviyoso di Dios pa medio di Spirito Santo. Hopi ta esnan cu kier a yega cerca di Hesus, pasobra nan tabata sa cu tin un forsa ta sali for di djE y tabata cura hende. Bendiciona nos ta, ora nos wordo scogi pa sirbi Dios. Palabra di Dios mes ta bisa nos: ”Hopi ta invita, ma poco ta scogi.” (M. 22,14)
Oracion: Tata Dios, danki pa mustra mi cu ami tambe mester acudi na Bo den oracion, prome cu mi bay tuma cualkier decision. Siña mi cumpli cu Bo boluntad. AMEN!
